Posts

  • Esperanta klavaro en CyanogenMod 7

    Por mia poŝtelefono (Google Nexus One) ekzistas kelkaj modifitaj versioj de la operaciumo. Mia preferata estas CyanogenMod, kies plej lastan version (CyanogenMod 7) mi instalis antaŭnelonge. Mi ĵus aldonis la Esperantajn literojn al ĝia klavaro per la ĉi-sekva modifo al packages/inputmethods/LatinIME:

    diff --git a/java/res/values-en/donottranslate-altchars.xml b/java/res/values-en/donottranslate-altchars.xml
    index 083befa..4edbeb5 100644
    --- a/java/res/values-en/donottranslate-altchars.xml
    +++ b/java/res/values-en/donottranslate-altchars.xml
    @@ -22,6 +22,6 @@
         <string name="alternates_for_e">3èéêëē</string>
         <string name="alternates_for_i">ìíîïī8</string>
         <string name="alternates_for_o">òóôõöōœø9</string>
    -    <string name="alternates_for_u">ùúûüū7</string>
    +    <string name="alternates_for_u">ùúûüūŭ7</string>
         <string name="alternates_for_y">ýÿ6</string>
     </resources>
    diff --git a/java/res/values/donottranslate-altchars.xml b/java/res/values/donottranslate-altchars.xml
    index 5038fd4..e30226a 100644
    --- a/java/res/values/donottranslate-altchars.xml
    +++ b/java/res/values/donottranslate-altchars.xml
    @@ -20,13 +20,14 @@
     <resources xmlns:xliff="urn:oasis:names:tc:xliff:document:1.2">
         <string name="alternates_for_a">àáâãäåæ</string>
         <string name="alternates_for_e">èéêë</string>
    -    <string name="alternates_for_h"></string>
    +    <string name="alternates_for_h">ĥ</string>
         <string name="alternates_for_i">ìíîï</string>
    +    <string name="alternates_for_j">ĵ</string>
         <string name="alternates_for_o">òóôõöœø</string>
    -    <string name="alternates_for_u">ùúûü</string>
    -    <string name="alternates_for_s">§ß</string>
    +    <string name="alternates_for_u">ùúûüŭ</string>
    +    <string name="alternates_for_s">§ŝß</string>
         <string name="alternates_for_n">ñ</string>
    -    <string name="alternates_for_c">ç</string>
    +    <string name="alternates_for_c">çĉ</string>
         <string name="alternates_for_y">ýÿ</string>
         <string name="alternates_for_q">1</string>
         <string name="alternates_for_w">2</string>
    @@ -35,7 +36,7 @@
         <string name="alternates_for_t">5</string>
         <string name="alternates_for_z"></string>
         <string name="alternates_for_l"></string>
    -    <string name="alternates_for_g"></string>
    +    <string name="alternates_for_g">ĝ</string>
         <string name="alternates_for_p">0</string>
         <string name="alternates_for_v"></string>
         <string name="alternates_for_ae"></string>
    diff --git a/java/res/xml/kbd_qwerty.xml b/java/res/xml/kbd_qwerty.xml
    index a4ab0f8..f706e67 100644
    --- a/java/res/xml/kbd_qwerty.xml
    +++ b/java/res/xml/kbd_qwerty.xml
    @@ -93,9 +93,13 @@
                 android:popupKeyboard="@xml/kbd_popup_template"
                 android:popupCharacters="@string/alternates_for_g" />
             <Key
    -            android:keyLabel="h" />
    +            android:keyLabel="h"
    +            android:popupKeyboard="@xml/kbd_popup_template"
    +            android:popupCharacters="@string/alternates_for_h" />
             <Key
    -            android:keyLabel="j" />
    +            android:keyLabel="j"
    +            android:popupKeyboard="@xml/kbd_popup_template"
    +            android:popupCharacters="@string/alternates_for_j" />
             <Key
                 android:keyLabel="k" />
             <Key
    diff --git a/java/res/xml/kbd_qwerty_black.xml b/java/res/xml/kbd_qwerty_black.xml
    index 787e4ef..687c1d0 100644
    --- a/java/res/xml/kbd_qwerty_black.xml
    +++ b/java/res/xml/kbd_qwerty_black.xml
    @@ -93,9 +93,13 @@
                 android:popupKeyboard="@xml/kbd_popup_template"
                 android:popupCharacters="@string/alternates_for_g" />
             <Key
    -            android:keyLabel="h" />
    +            android:keyLabel="h"
    +            android:popupKeyboard="@xml/kbd_popup_template"
    +            android:popupCharacters="@string/alternates_for_h" />
             <Key
    -            android:keyLabel="j" />
    +            android:keyLabel="j"
    +            android:popupKeyboard="@xml/kbd_popup_template"
    +            android:popupCharacters="@string/alternates_for_j" />
             <Key
                 android:keyLabel="k" />
             <Key
    

    Se vi volas mem apliki la ĉi-supran flikaĵon, necesas fari tion dum vi sekvas la instrukcion pri tradukado de CyanogenMod 7.

  • Esperanta klavaro por mia poŝtelefono (Google Nexus One)

    Antaŭnelonge mi aĉetis novan poŝtelefonon, nome Google Nexus One. Ĝis nun mankis la Esperantaj literoj en ĝia klavaro, sed mi sukcesis aldoni ilin. Anstataŭ aldoni ilin al la operaciumo mem (kio estus sufiĉe malfacile), mi aldonis ilin al Bulkey. Bulkey estas bulgara klavaro por Android (la operaciumo de la poŝtelefono), kaj bonŝance ĝi estas malferma, kaj do tre facile modifebla. Mi do senprobleme aldonis la Esperantajn literojn al la latina klavaro en Bulkey (unu el kelkaj elekteblaj). Jen sekvas la ŝanĝoj, kiujn mi faris, por ke mi povu estonte refari ilin laŭbezone:

    diff -r f8638a4e9fa5 res/values/strings.xml
    --- a/res/values/strings.xml	Tue May 11 17:22:16 2010 +0300
    +++ b/res/values/strings.xml	Tue Jul 13 23:26:59 2010 -0400
    @@ -58,6 +58,12 @@
         <string name="inputMethod">Input Method</string>
         <string name="prefs_kbd_type">which_bg_keyboard</string>
         <string name="alternates_for_short_i">ѝ</string>
    +    <string name="alternates_for_c">ĉ</string>
    +    <string name="alternates_for_g">ĝ</string>
    +    <string name="alternates_for_h">ĥ</string>
    +    <string name="alternates_for_j">ĵ</string>
    +    <string name="alternates_for_s">ŝ</string>
    +    <string name="alternates_for_u">ŭ</string>
         <string name="prefs_sound_on">sound_on</string>
         <string name="prefs_auto_switch">Switch to latin input</string>
         <string name="prefs_auto_switch_summary">Auto switch to latin input on URL and Email fields</string>
    diff -r f8638a4e9fa5 res/xml/qwerty.xml
    --- a/res/xml/qwerty.xml	Tue May 11 17:22:16 2010 +0300
    +++ b/res/xml/qwerty.xml	Tue Jul 13 23:26:59 2010 -0400
    @@ -34,7 +34,7 @@
             <Key android:codes="114" android:keyLabel="r"/>
             <Key android:codes="116" android:keyLabel="t"/>
             <Key android:codes="121" android:keyLabel="y"/>
    -        <Key android:codes="117" android:keyLabel="u"/>
    +        <Key android:codes="117" android:keyLabel="u" android:popupKeyboard="@xml/kbd_popup_template" android:popupCharacters="@string/alternates_for_u"/>
             <Key android:codes="105" android:keyLabel="i"/>
             <Key android:codes="111" android:keyLabel="o"/>
             <Key android:codes="112" android:keyLabel="p" android:keyEdgeFlags="right"/>
    @@ -43,12 +43,12 @@
         <Row>
             <Key android:codes="97" android:keyLabel="a" android:horizontalGap="5%p"
                     android:keyEdgeFlags="left"/>
    -        <Key android:codes="115" android:keyLabel="s"/>
    +        <Key android:codes="115" android:keyLabel="s" android:popupKeyboard="@xml/kbd_popup_template" android:popupCharacters="@string/alternates_for_s"/>
             <Key android:codes="100" android:keyLabel="d"/>
             <Key android:codes="102" android:keyLabel="f"/>
    -        <Key android:codes="103" android:keyLabel="g"/>
    -        <Key android:codes="104" android:keyLabel="h"/>
    -        <Key android:codes="106" android:keyLabel="j"/>
    +        <Key android:codes="103" android:keyLabel="g" android:popupKeyboard="@xml/kbd_popup_template" android:popupCharacters="@string/alternates_for_g"/>
    +        <Key android:codes="104" android:keyLabel="h" android:popupKeyboard="@xml/kbd_popup_template" android:popupCharacters="@string/alternates_for_h"/>
    +        <Key android:codes="106" android:keyLabel="j" android:popupKeyboard="@xml/kbd_popup_template" android:popupCharacters="@string/alternates_for_j"/>
             <Key android:codes="107" android:keyLabel="k"/>
             <Key android:codes="108" android:keyLabel="l" android:keyEdgeFlags="right"/>
         </Row>
    @@ -60,7 +60,7 @@
                     android:isSticky="true" android:keyEdgeFlags="left"/>
             <Key android:codes="122" android:keyLabel="z"/>
             <Key android:codes="120" android:keyLabel="x"/>
    -        <Key android:codes="99" android:keyLabel="c"/>
    +        <Key android:codes="99" android:keyLabel="c" android:popupKeyboard="@xml/kbd_popup_template" android:popupCharacters="@string/alternates_for_c"/>
             <Key android:codes="118" android:keyLabel="v"/>
             <Key android:codes="98" android:keyLabel="b"/>
             <Key android:codes="110" android:keyLabel="n"></Key>
    
  • Esperanta Dvoraka klavarfasono por Makintoŝo

    Antaŭ monato mi aĉetis Makintoŝon (pli specife MacBook-on). Mi volis krei Esperantan Dvorakan klavarfasonon, similan al tiu ĉi, kiun mi kreis por Linukso. Post iom da serĉado, mi trovis retejon, kiu ebligas krei proprajn klavarfasonojn. Tie, mi elektis Dvorakan klavarfasonon kiel bazon, kaj aldonis la esperantajn literojn ĉi tiel:

    OSc $0108
    OCc $0108
    Oc $0109
    OSg $011C
    OCg $011C
    Og $011D
    OSh $0124
    OCh $0124
    Oh $0125
    OSj $0134
    OCj $0134
    Oj $0135
    OSs $015C
    OCs $015C
    Os $015D
    OSu $016C
    OCu $016C
    Ou $016D
    

    La retejo generis por mi .keylayout-dosieron XML-formatan, kiun mi metis en /Library/Keyboard Layouts. Post elsaluto kaj reensaluto mia klavaro estis elektebla en System Preferences → Language & Text → Input Sources.

  • Skrablo per AJAX

    Mi denove ekhavas emon plibonigi mian Esperantlingvan skrablo-ludejon. La sistemo estas plene farita per Java, sed nun mi pripensas forlasi tion ĉar Java-apletoj povas esti ĝenaj al la uzanto. Flash estas same ĝena, do ankaŭ tion mi volas eviti. Do mi pripensas reprogrami la tuton per PHP kaj Javascript/AJAX.

    Mi kontrolis, ĉu jam iu alia faris skrablo-ludejon per AJAX kaj tuj trovis ĉi tiun. Ĝi sufiĉe bone funkcias, sed mi tuj rimarkis multajn plibonigendajn aferojn. Mi pensas ke mi povus fari pli bonan, kiu kompreneble estus en Esperanto kaj eventuale ankaŭ en aliaj lingvoj. (Mia koramikino tre ŝatus ludi skrablon en la bulgara!)

    Ĉu vi pensas ke indas refari la skrablo-ludejon per AJAX?

  • Intrepid Ibex

    Hodiaŭ aperis nova versio de Ubuntu, kiu nomiĝas Intrepid Ibex. Mi ĵus instalis ĝin en mia portebla komputilo kaj ĝi jam tre plaĉas al mi. Estis unu problemo pri la sendrata retkarto, sed mi tuj trovis solvon en la cimo-datumbazo de Ubuntu. Multaj aferoj funkcias pli bone ol en la lasta versio. Ekzemple mia komputilo nun pli rapide reekfunkcias kiam mi malfermas ĝin, YouTube-videoj ludiĝas pli glate, kaj la atentigilo por GMail-mesaĝoj pli bone funkcias. Evidente linukso daŭre rapide progresas.

  • Spamo, kia ĝeno!

    kvarko ĵus atentigis min pri amasa spamado en la USEJ-Vikio. Bonŝance mi havis rezervkopion senspaman, do estis sufiĉe facile forigi la spamon. Mi igis la vikion neredaktebla por ke plia spamo ne aperu. (La lasta nespama redakto okazis en 2005!) USEJ plej bone starigu pli modernan vikion kaj kopiu la malnovajn informojn se ili deziras plu vikiumi.

    La interreto estis pli plaĉa loko antaŭ la amasa apero de spamistoj, ĉu ne?

  • Reveno al LiveJournal

    Antaŭ preskaŭ du jaroj, mi forlasis LiveJournal kaj movis mian blogon al mia propra retejo. Bedaŭrinde, tiu eksperimento montriĝis katastrofo. Apenaŭ plu oni reagis al miaj enskriboj, kaj aperis lavango da spamaj komentoj. Do mi ĵus kopiis miajn intertempe faritajn enskribojn al LiveJournal, kaj ekde nun mi afiŝos ĉiujn miajn enskribojn tie.

  • Ŝerco

    Ĉu vi aŭdis pri la disleksia agnostika Esperantisto, kiu kuŝis en la lito, ne povanta endormiĝi? Turmentadis lin la demando, ĉu ekzistas IDO!

  • Interesaĵo por Arono

    Laŭ nova studo de David Simpson ĵus aperinta en Lingva Kritiko:

    Oni trovas ke la plej malofta korelativo estas ĉial. Efektive, la vorto ĉial okazas preskaŭ neniam: ĝi aperas nur unufoje el ĉiom da la tekstoj, en listo da korelativoj en la Ekzercaro de L.L. Zamenhof.

    Leginte tion, mi tuj pensis pri Arono, kiu iam faris albumon titolitan ĝuste Ĉial.

  • Venu al ARE en Silver Bay, Novjorkio

    Se vi loĝas en orienta Kanado aŭ Usono, nepre pripensu ĉeesti la ĉi-jaran Aŭtunan Renkontiĝon de Esperanto (ARE) en Silver Bay, Novjorkio. Ĝi okazos de la 6-a ĝis la 8-a de oktobro, kaj ŝajne venos sufiĉe multaj junuloj (inkluzive de mi, kompreneble)! Mi volonte veturigos aliajn de la Otava regiono.

    Jen estas miaj fotogalerioj de ARE 2002 kaj ARE 2004. Mi ĉeestis ankaŭ la pasintjaran ARE.

  • Bertilo pri na-ismo

    Bertilo lastatempe afiŝis interesan artikolon pri na-ismo. Lia opinio bone kongruas kun la mia:

    Ŝajnas, ke plej multaj Esperantistoj rigardas la novan inventaĵon na kiel neakcepteblan aŭ eĉ kiel rekte kontraŭ-Fundamentan. Pri tio oni multe disputis, kaj mi nun ne intencas remaĉi la argumentojn de ambaŭ flankoj, … sed mi tamen deklaras, ke ankaŭ laŭ mi temas pri neakceptebla reformo de la lingvo.

  • Finfine linuksokongruaj sendrataj retkartoj!

    Pasintsemajne mi estis en Las Vegas por ĉeesti du konferencojn pri komputila sekureco: Black Hat kaj Defcon. Ambaŭ estis tre interesaj kaj mi lernis multon. Cetere mi solvis problemon, kiun mi havis jam delonge. Nome, la sendrata retkarto en mia portebla komputilo ne estis kongrua kun Linukso. Pro tio mi devis uzi la vindozan pelilon kun ndiswrapper, kio ne ĉiam bone funkciis. Sed ĉe Defcon inter la vendantoj estis unu, kiu vendis sendratajn retkartojn, antenojn, ktp. De li mi aĉetis novan karton, kiu perfekte funkcias en Linukso.

    Post mia reveno mi anstataŭigis ankaŭ la sendratan retkarton en la portebla komputilo de Teodora, kiu antaŭe havis simile aĉan karton. Dank’ al tio, Ubuntu nun perfekte ruliĝas ankaŭ en ŝia komputilo, kaj ni ambaŭ estas kontentaj Linukso-uzantoj. :-)

  • Esperanta Dvoraka klavarfasono

    Kiam mi unuafoje isntalis Ubuntu en mian porteblan komputilon, mi kreis Esperantan Dvorakan klavarfasonon. Ĝi estis tute sama kiel la Usona Dvoraka klavaro, krom ke per AltGr eblis aldoni supersignon. Ekzemple, mi tajpis AltGr+C por skribi “ĉ”, AltGr+G por “ĝ”, ktp.

    Antaŭ du semajnoj mi instalis la plej lastan version de Ubuntu. Mi decidis rezervkopii miajn dosierojn, forviŝi mian durdiskon kaj instali ĝin de nulo. Bedaŭrinde mi forgesis kopii la dosieron kiu enhavis mian klavarfasonon, do mi devis rekrei ĝin. Nun mi afiŝas ĝin ĉi tie por ke mi ne perdu ĝin estonte. Kaj eble ĝi povas esti utila al iu alia. Do jen ĝi:

    default partial alphanumeric_keys
    xkb_symbols "basic" {
    
      name[Group1]= "Esperanto";
    
        key <TLDE> { [       grave,	asciitilde	]	};
    
        key <AE01> { [	    1,	exclam 		]	};
        key <AE02> { [	    2,	at		]	};
        key <AE03> { [	    3,	numbersign	]	};
        key <AE04> { [	    4,	dollar		]	};
        key <AE05> { [	    5,	percent		]	};
        key <AE06> { [	    6,	asciicircum	]	};
        key <AE07> { [	    7,	ampersand	]	};
        key <AE08> { [	    8,	asterisk	]	};
        key <AE09> { [	    9,	parenleft	]	};
        key <AE10> { [	    0,	parenright	]	};
        key <AE11> { [ bracketleft,	braceleft	]	};
        key <AE12> { [ bracketright, braceright	]	};
    
        key <AD01> { [  apostrophe,	quotedbl	]	};
        key <AD02> { [	comma,	less		]	};
        key <AD03> { [      period,	greater		]	};
        key <AD04> { [	    p,	P		]	};
        key <AD05> { [	    y,	Y		]	};
        key <AD06> { [	    f,	F		]	};
        key <AD07> { [	    g,	G, gcircumflex, Gcircumflex	]	};
        key <AD08> { [	    c,	C, ccircumflex, Ccircumflex	]	};
        key <AD09> { [	    r,	R		]	};
        key <AD10> { [	    l,	L		]	};
        key <AD11> { [	slash,	question	]	};
        key <AD12> { [	equal,	plus		]	};
    
        key <AC01> { [	    a,	A 		]	};
        key <AC02> { [	    o,	O		]	};
        key <AC03> { [	    e,	E		]	};
        key <AC04> { [	    u,	U, ubreve, Ubreve	]	};
        key <AC05> { [	    i,	I		]	};
        key <AC06> { [	    d,	D		]	};
        key <AC07> { [	    h,	H, hcircumflex, Hcircumflex	]	};
        key <AC08> { [	    t,	T		]	};
        key <AC09> { [	    n,	N		]	};
        key <AC10> { [	    s,	S, scircumflex, Scircumflex	]	};
        key <AC11> { [	minus,	underscore	]	};
    
        key <AB01> { [   semicolon,	colon		]	};
        key <AB02> { [	    q,	Q		]	};
        key <AB03> { [	    j,	J, jcircumflex, Jcircumflex	]	};
        key <AB04> { [	    k,	K		]	};
        key <AB05> { [	    x,	X		]	};
        key <AB06> { [	    b,	B		]	};
        key <AB07> { [	    m,	M		]	};
        key <AB08> { [	    w,	W		]	};
        key <AB09> { [	    v,	V		]	};
        key <AB10> { [	    z,	Z		]	};
    
      include "level3(ralt_switch)"
    };
    

    Tion mi metis en la dosieron /usr/share/X11/xkb/symbols/epo.

  • Ubuntu

    Antaŭ du semajnoj Vindozo komencis kolerigi min, do mi plene forviŝis la durdiskon de mia portebla komputilo kaj instalis Linukson, specife la distribuaĵon “Ubuntu”. Mi elektis ĝuste tiun distribuaĵon ĉar ĝi estas nun inter la plej popularaj, do devus esti facile trovi en interretaj forumoj solvojn al eventualaj problemoj.

    Post la tre facila instalo, preskaŭ ĉiuj aparatoj simple ekfunkciis, kio iom mirigis min. Kiam mi antaŭ longa tempo instalis Vindozon, necesis elŝuti kaj instali pelilojn por kelkaj aparatoj (interalie la retkarto kaj sonkarto). Sed en Ubuntu tio tute ne necesis, krom por la sendrata retkarto. La sendrata retkarto estas escepta ĉar la firmao, kiu faris ĝin, rifuzas fari linuksan pelilon, kaj cetere rifuzas malkaŝi la detalojn pri la karto, kiuj estus necesaj por fari pelilon. Do mi devis elŝuti la Vindozan pelilon kaj agordi iun ruzan programon, kiu kapablas uzi Vindozan pelilon en Linukso. En la fino mi sukcesis, sed kiam mi venontfoje aĉetos komputilon, mi certigos ke ĝi ne havas aparatojn faritajn de firmaoj kiuj fajfas pri Linukso.

    Unu afero kiu iom mankas al mi estas “Ek!”, kiun mi uzis en Vindozo por tajpi Esperantajn literojn. Mi agordis ĝin laŭ la x-sistemo, kaj tiel mi povis same tajpi, ĉu unikode ĉu ne. Laŭ mia scio, ne ekzistas tia programo en Linukso, do mi devis trovi alian solvon. Ubuntu fakte havas jam pretan Esperantan klavarfasonon, sed ĝi ne taŭgas por mi ĉar mi uzas Dvorak-an klavarfasonon, ne QWERTY-an. Do mi mem kreis Dvorak-an Esperantan klavarfasonon. Ĝi estas tute same kiel la kutima Dvorak-a, sed eblas per “AltGr”-“c” tajpi “ĉ”, per “AltGr”-“g” tajpi “ĝ”, ktp. Jam mi povas sufiĉe rapide tajpi per tiu nova klavaro, do verŝajne mi baldaŭ pri Ek! ne plu pensos.

    Ĝenerale tre plaĉas al mi Ubuntu, kaj mi tre ĝojas ke mia komputilo pli bone kaj rapide funkcias ol antaŭ du semajnoj. Linukso vere bone progresas!

  • Mi vidis la Internacian Kosmostacion!

    Hodiaŭ mi por la unua fojo vidis per la propraj okuloj la Internacian Kosmostacion. Mi eksciis ĝuste kiam mi rigardu al la ĉielo dank’ al programo havebla en ĉi tiu retpaĝo de NASA. (Klaku sur “Start Applet” por ruli ĝin.) Tuj post mia reveno de la laborejo mi rigardis al la ĝusta loko kaj tuj ekvidis ĝin. Ĝi estis tute facile videbla, pli brila ol steloj aŭ planedoj. Se mi ne scius ke temas pri la Internacia Kosmostacio mi verŝajne pensus ke temas pri aviadilo. Ĝi tre rapide moviĝis kaj restis videbla nur dum minuto kaj 40 sekundoj. Tio estis tre interesa sperto, kaj mi nepre rigardos ĝin denove. Laŭ la programo, ĝi videblas preskaŭ ĉiutage. Ankaŭ vi provu iam!

  • Apple komencas kolerigi min

    Antaŭ du jaroj mi aĉetis iPod-on (aŭ kiel mi ŝerce diras, iPizujon). Dum la unua jaro ĝi bone funkciis, sed poste la baterio rapide malboniĝis. Ĝi devas daŭri ok horojn, sed jam pasint-somere ĝi daŭris nur horon, kaj lastatempe nur 20 minutojn. Do mi resendis ĝin al Apple la 15-an de februaro, kaj pagis 80 dolarojn por nova baterio. Ili ricevis ĝin kaj konfirmis la problemon la sekvan tagon, sed de tiam faris nenion. Kial mi devas tiel longe atendi? Mia opinio pri Apple vere malboniĝas. Baterio devus havi almenaŭ du-tri-jaran vivon, kaj Apple devus pli rapide reagi aŭ almenaŭ ne preni monon de la kliento ĝis ili faras la riparon!

  • Rekonstruita retejo

    Lastatempe mi faris anglalingvan retejon per la programo Drupal. Tio sufiĉe glate funkciis, do mi decidis uzi la programon ankaŭ por mia Esperantlingva retejo. Mi devis sufiĉe multe labori por konverti ĉiujn paĝojn kaj enporti mian taglibron, sed en la fino mi sukcesis, kaj jen vi vidas la rezulton!

    Mi klopodis traduki ĉiujn publike-videblajn partojn (krom la galerio, kiun mi ankoraŭ ne tuŝis) en Esperanton, do nepre komentu se vi rimarkas ion netradukitan. Mi iom post iom tradukos la ceteron, kio kredeble helpos al TEJO, kiu planas iam lanĉi novan retejon bazitan sur Drupal.

  • Mi venkis, 510-409!

    Skrablo-tabulo

    Bonvenon al la skrabloludo!
    >>> Komputilo2 gajnis 46 poentojn, ludante HAĜULAN.
    >>> Argilo gajnis 69 poentojn, ludante ENDEPONIS.
    >>> Komputilo2 gajnis 102 poentojn, ludante EKTIMADUS.
    >>> Argilo gajnis 9 poentojn, ludante ŜI.
    >>> Komputilo2 gajnis 36 poentojn, ludante HEJTEBL.
    >>> Argilo gajnis 178 poentojn, ludante REKURIGO kaj HEJTEBLU.
    >>> Komputilo2 gajnis 31 poentojn, ludante PISEM, ŜIP, MI, AS kaj UM.
    >>> Argilo gajnis 12 poentojn, ludante OV kaj VE.
    >>> Komputilo2 gajnis 35 poentojn, ludante FELON, FE, EK, OR kaj NI.
    >>> Argilo gajnis 86 poentojn, ludante SIMBOLAJ kaj MOV.
    >>> Komputilo2 gajnis 37 poentojn, ludante ĴOKER kaj MOVO.
    >>> Argilo gajnis 36 poentojn, ludante AŬ, LA kaj AŬ.
    >>> Komputilo2 gajnis 42 poentojn, ludante ĤI kaj AĤ.
    >>> Argilo gajnis 20 poentojn, ludante EDZIN.
    >>> Komputilo2 gajnis 22 poentojn, ludante FONTE, NAŬ kaj VET.
    >>> Argilo gajnis 44 poentojn, ludante GORĜ kaj EDZINO.
    >>> Komputilo2 gajnis 14 poentojn, ludante MEĈ kaj AĈ.
    >>> Argilo gajnis 16 poentojn, ludante CITAS.
    >>> Komputilo2 gajnis 12 poentojn, ludante NIĈ.
    >>> Argilo gajnis 23 poentojn, ludante PAROLIS kaj PO.
    >>> Komputilo2 gajnis 40 poentojn, ludante FALU, ALA, LAŬ kaj UJ.
    >>> Argilo gajnis 9 poentojn, ludante OVAJ.
    >>> Komputilo2 perdis 8 poentojn pro siaj restantaj tegoletoj.
    >>> Argilo gajnis 8 poentojn pro tiuj tegoletoj.
    >>> La ludo finiĝis.
    

    Nuna humoro: ekscitita
    Nuna muziko: Down To The Bone - Global Village

  • Skrablo

    Ĉi-semajne mi multe prilaboris mian skrablo-ludejon. Mi korektis kelkajn cimetojn, donis al ĝi novan fasonon, kaj plej grave, mi aldonis artefaritan inteligenton. Jes, finfine eblas ludi skrablon kontraŭ la komputilo! La nura problemo estas, ke la komputilo ludas iom tro bone. Ĝis nun mi ne sukcesis venki super ĝi. :-) Mi devos aranĝi ke estu kelkaj niveloj.

    Tre strange, ke mi ne havis fortojn por prilabori la ludon dum mi estis senlabora, sed nun kiam mi laboras ok horojn tage, mi emas pasigi miajn vesperojn programante. :-) Nepre komentu se vi havas ideojn por pliaj plibonigoj al la ludejo. Kredeble mi daŭrigos la programadon venontsemajne.

    Nuna humoro: kreema

  • Komenco, rekomenco, kaj rerekomenco

    Antaŭ unu semajno, mi komencis labori por Entrust. Ĝis nun la nova posteno tre plaĉas al mi! La konstruaĵo estas tre bela. Ĝi havas grandan ripozejon sur ĉiu etaĝo, kaj eĉ bilardan tablon, kiun mi kaj mia ĉefo uzis dum nia tagmanĝo hodiaŭ. Mi ankoraŭ devas iom prepari min antaŭ ol ekfari veran laboron, sed mi havas la impreson ke la laboro estos tre interesa.

    Fakte mia ĉefo kaj mi havas plian komunan intereson krom bilardo, nome ĵongladon! Li sciigis min pri loka ĵongla klubo kiu renkontiĝas eĉ du fojojn semajne. Post tre longa tempo sen ĵonglado mi vere ĝojas pri tio. Mi nepre ĉeestos la postmorgaŭan renkontiĝon!

    Plia interesa afero estas tio, ke arono rerekomencis la projekton Radio Verda, ĉi-foje kiel podkastejon. Mi tre ŝatas la novan formaton, kaj deziras al la projekto longan vivon! Nun mi elpensu ian kontribuaĵon…

  • Nova laboro

    Post pluraj monatoj da laborserĉado, finfine venis konkreta rezulto! Antaŭ kelkaj tagoj, Entrust ofertis al mi laborpostenon, kiun mi tuj akceptis. Mi komencos labori tie post unu semajno. Entrust estas unu el la plej grandaj firmaoj, kiuj faras softvaron por komputila sekureco. Mia laboro tie estos certigi ke ilia softvaro estas sekura kontraŭ la plej lastaj atakoj. Sonas al mi tre interese!

    Nuna humoro: optimisma
    Nuna muziko: DĴ Kunar - Funk (R&B Version)

  • Linukso denove

    Ve, jam de tri monatoj mi nenion skribis! Sekvos do eta serio da enskriboj pri la okazintaĵoj dum tiu periodo. Sed unue mi skribu iomete pri la nuno.

    Fine de la jaro 1995, unu el miaj amikoj informis min pri nove aperinta, senkosta operaciumo, nomita Linukso. Mi tuj elŝutis (per modemo, ve!) kaj instalis ĝin. Komence mi nenion komprenis, sed iom post iom mi alkutimiĝis, kaj en la fino ĝi plaĉis al mi pli ol DOS kaj Vindozo, interalie pro la manko de kraŝoj! Dum la sekvaj jaroj, mi uzis foje Linukson, foje Vindozon. Kutime mi havis ambaŭ en la komputilo, do mi povis elekti laŭbezone. Sed iom post iom Vizdozo pliboniĝis, kaj mi efektive forlasis Linukson.

    Sed antaŭ kelkaj tagoj mi eksopiris al Linukso kaj decidis reinstali ĝin. Unue mi instalis la varianton Gentoo, sed mi trovis ke estas tro ĝene atendi minutojn aŭ horojn por instali novan programon. (Ĉiun programon oni kompilas rekte de la fontokodo.) Do mi forviŝis ĝin kaj instalis Fedora Core, kiu havas jam kompilitan programaron. Bedaŭrinde la instalo ne estis senproblema, kaj mi devis kelkajn aferojn aranĝi permane. Sed en la fino mi sukcesis ĉion funkciigi laŭ miaj preferoj.

    Mi vere miras pri tio, kiom progresis Linukso dum la pasintaj jaroj! Ne plu oni devas ĉion fari per la komanda linio. Fakte preskaŭ ĉio nun havas grafikan interfacon. Mi ĝojas ankaŭ pri tio, ke eblas konekti al dividataj dosierujoj de Vindozaj komputiloj. Tio utilas al mi ĝuste nun por aŭskulti MP3-ojn de mia kolektego. Ŝajne ĉio estas plene unikoda, kaj mi eĉ sukcesis aranĝi Esperantan klavarfasonon, per kiu mi nun tajpas.

    Kompreneble restas kelkaj aferetoj, kiuj povus pliboniĝi, sed la samon mi povus diri pri Vindozo. Ĝenerale mi tre kontentas!

    Nuna humoro: komputilema
    Nuna muziko: The Whispers - Headlights

  • Laborserĉado

    Antaŭ unu monato, sufiĉe ripozinte post la fino de miaj universitataj studoj, mi komencis serioze serĉi laborpostenon. Jam mi kandidatiĝis por 14 postenoj, sed ĝis nun venis nenia reago. Pri tio mi tamen ne maltrankviliĝas. La plej interesaj postenoj estas en la Kanada registaro, kiu onidire ne rapide respondas.

    Aliteme, mia kalendaro estas sufiĉe plena je interesaj okazaĵoj. De la 21-a ĝis la 23-a de majo, okazos Esperanto-renkontiĝo en Toronto, kiun planas ĉeesti mi, arono, ruckachoni, kaj espereble ankaŭ Jason. Je la 28-a de majo edziĝos mia bona amiko Vince. Inter tiuj du eventoj mi planas viziti miajn gepatrojn. Je la 18-a de junio okazos mia magistriĝa ceremonio. De la 29-a de junio ĝis la 27-a de de julio mi kaj teodora ferios en Bulgario. Certe ne mankos temoj por estontaj taglibraj enskriboj!

    Nuna humoro: malsata
    Nuna muziko: Funk in Bangladesh

  • Biciklado

    Dum la paskaj ferioj mi vizitis miajn gepatrojn. Kiel ĉiam, estis tre plaĉe resti kun ili dum kelkaj tagoj. Cetere mi revidis multajn delonge neviditajn amikojn de miaj bazlernejo kaj mezlernejo.

    Kiam mi revenis al Otavo, mi alportis mian biciklon, kiun mi jam delonge ne uzis. En Otavo estas tuta aro de biciklaj vojoj, de kiu mi volas profiti. Tion mi komencis pasintsemajne, kaj daŭrigis ĉi-matene per 30-kilometra bicikla vojaĝo. Mi esperas dum la sekvaj semajnoj esplori la tutan aron!

    Nuna humoro: energioplena
    Nuna muziko: Down To The Bone - You’re The Only Reason

  • Denove Air Farce

    Se vi estas kanadano (aŭ honora kanadano kiel kvarko), spektu almenaŭ unufoje The Hour, kaj poste spektu “George Stroumboulopoulos & Ralph Goodale” ĉi tie. Vi ridegos!

    Nuna humoro: ridegema

  • Kiam venos printempo?

    Sendube vintro havas siajn avantaĝojn, sed la aliaj sezonoj eĉ pli. Jam mi spertis sufiĉe da vintro ĉi-jare, sed ŝajne mi devas travivi ankoraŭ iom. Ĵus mi vekiĝis, kaj rigardante tra la fenestro mi vidas ke ĉio estas denove neĝkovrita. (Almenaŭ la pavimo kaj trotuaroj estis pli malpli senneĝaj hieraŭ.) Cetere oni prognozas por hodiaŭ ankoraŭ 15 cm da neĝo. Ve!

    Por pensigi min pri pli varma vetero, mi enskribiĝis en konkurso, kiun organizas ĉiujare mia universitato. Oni devas diveni, kiam la temperaturo unuafoje atingos 20 gradojn. En la 2000-a jaro, tio okazis je la 8-a de marto, kio donas almenaŭ iom da espero. :-) Mia diveno tamen ne estas tiel optimisma; mi elektis la 19-an de aprilo.

    Nuna humoro: malvarma

  • Doloras la kruroj

    Hodiaŭ mi konstatis ke du horoj da vigla glitkurado povas dolorigi la krurojn, aparte se oni ne regule ekzercas sin. :-) Tion mi tamen planas ŝanĝi komence ĉi-printempe. Mi loĝas nur kelkcent metrojn for de tre longa bicikla vojo, kiu estas parto de tuta aro da biciklaj vojoj. Kiam malaperos la neĝo, mi komencos multe bicikli.

    Aliteme, mi ĵus ricevis kvar libroformajn kopiojn de mia disertaĵo. Mi petis tiom, ĉar jam miaj gepatroj kaj geavoj petis kopion. Ili tute ne spertas pri matematiko, sed multe fieras pri mia laboro. :-) Mi planas viziti ilin dum la paskaj ferioj.

    Nuna humoro: senenergia
    Nuna muziko: Deadline (jt_deadl.xm)

  • Glitkurado sur la kanalo

    Hodiaŭ mi unuafoje glitkuris sur la kanalo Rideau, kun teodora, arono, kaj ruckachoni. Mi trovis ke estas eĉ pli amuze glitkuri, kiam oni povas iri tre longan distancon sen devi turni sin kaj reiri. Mi ne certas, ĉu ni havos plian ŝancon glitkuri ĉi-vintre, sed Teodora kaj mi planas aĉeti glitŝuojn por ke ni povu multfoje glitkuri venont-vintre!

    Nuna humoro: laca

  • Nova kaj malnova ludoj

    Hieraŭ vespere teodora kaj mi eliris kun ruckachoni kaj arono. Komence ni planis iri al la japana/korea restoracio “Joy”, sed ĝi estis plena. Do ni iris al la sufiĉe proksima japana restoracio “Ichibei”, kie ni ĉiuj ĝuis la aparte bongustan manĝaĵon.

    Poste ni iris al la apartamento de ruckachoni kaj arono por provi la de ili nove aĉetitan ludon “Catch Phrase”. Tiun ludon ludas du teamoj. Teamano en sia vico vidas vorton, kaj devas kiel eble plej rapide igi siajn kunteamanojn diri tiun vorton (sen diri la koncernan vorton, kompreneble!). Poste ano de la kontraŭa teamo vidas alian vorton kaj devas same fari. Estas tempolimo, kaj kiu teamo havas la vicon kiam finiĝas la tempo, tiu teamo malgajnas. Ni trovis la ludon tre amuza, kaj plurfoje ludis.

    Ni ludis ankaŭ la kartludon “Uno”, kiun mi jam de pluraj jaroj ne ludis. Temas pri simpla ludo, sed evidente ne sufiĉe simpla por mi, ĉar mi eĉ tri sinsekvajn fojojn forgesis la saman regulon kaj estis punita. ;-) Sed iel mi en la fino sukcesis gajni la ludon.

  • Jen ĝi...

    Jam plurfoje mi menciis ĉi tie mian disertaĵon. Nu, finfine ĝi estas akceptita de miaj profesoroj kaj de la universitato, kio signifas ke mi nun estas magistro pri matematiko! Por tiuj, kiuj interesiĝas, jen ĝi:

    Digital Signcryption

    Nuna humoro: produktema
    Nuna muziko: Interstate 77 Soundtrack - 07

  • Esperantlingva muziko

    Lastatempe mi multe pligrandigis mian Esperantlingvan muzikokolekton. Antaŭe mi posedis nur du albumojn:

    • Merlin - Por la mondo
    • Merlin - Ho! Mia kor’!

    Tiujn du diskojn afable donacis al mi Neusa Priscotin Mendes de Brazilo, kiun mi ekkonis jam kiel komencanto. Aldoniĝis al tiuj du la sekvaj albumoj, kiujn mi mendis de Vinilkosmo:

    • Dolcxamar - Lingvo intermonda
    • Esperanto desperado - Brokantaĵoj
    • Esperanto desperado - Hotel desperado
    • Kore - Kia viv’
    • La porkoj - Ŝako
    • Persone - 62 minutoj
    • Persone - En la spegulo
    • Persone - …sed estas ne
    • Persone - Sen
    • Team - Ora team’
    • Thierry Faverial - La ŝosoj de l’ utopi’

    Ĝis nun mi ne sufiĉe profunde aŭskultis ilin por detale prikomenti ilin, sed mi povas diri ke jam infektas min kelkaj el la kantoj: “Ĵaluzo” kaj “Vivo-riske” de Kore, “Ĉu neniam plu” kaj “Estu ĉiam” de Persone, “Festeno” kaj “Ĉu vivas vi?” de Esperanto desperado, kaj “En kaĉ’” de Team.

    Nuna humoro: denove energioplena
    Nuna muziko: Persone - Estu ĉiam

  • Denove libera!

    Kiel vi verŝajne rimarkis, mi dum du monatoj nenion signifan skribis en mian taglibron. Ĉiun fojon, kiam mi ekemis skribi ion, mi pensis al mi ke mi pli bone prilaboru la disertaĵon. Ĉu tio en la fino okazis, tamen estas alia afero…

    Ĉiaokaze nun mi multe pli ofte skribos, ĉar la disertaĵo nun estas (plejparte) malantaŭ mi. Hieraŭ mi donis ĝin al la Oficejo de Postbakalaŭraj Studoj, kaj al la tri profesoroj (inkluzive de mia gvid-profesoro) kiuj legos ĝin. Nun mi nur devas atendi ĝis la 7-a de januaro, kiam tiuj profesoroj aŭ aprobos ĝin tia, kia ĝi estas, aŭ petos revizion.

    Hieraŭ ankaŭ estis grava tago ĉar la Supera Kortumo de Kanado donis sian opinion pri edziĝo de samseksaj paroj. Ili deklaris ke estus laŭkonstitucie permesi edziĝon de samseksaj paroj, kaj ke la Parlamento de Kanado rajtas ŝanĝi la difinon de edziĝo. La Liberala Partio (kiu nun formas la registaron) anoncis ke ili klopodos fari tion komence de la nova jaro. Bedaŭrinde pluraj deputitoj de tiu partio jam indikis ke ili voĉdonos kontraŭ tio, sed feliĉe estas du aliaj partioj (la Nova Demokratia Partio kaj la Bloko Kebekia) kies deputitoj forte subtenas la iniciaton. (La Konservativa Partio forte kontraŭas.) Do estas verŝajne ke la proponota leĝprojekto sukcesos.

    Nuna humoro: sukcesa
    Nuna muziko: Patrice Rushen - Remind Me

  • Novaĵo el Beogrado

    Por tiuj el vi, kiuj konas Hokan kaj Sonja:

    http://ikso.net/~hokanx/iva/

    Nuna humoro: ekscitita

  • Strangega sonĝo

    Jen estas ekzemplo de tio, kiel strangaj estas miaj sonĝoj.

    En mia plej lasta sonĝo, la Kanada kaj Sveda virinaj manpilkaj teamoj ludis “manpilkon” en la gimnastikejo de mia bazlernejo (Thamesville Area Central School). Mi skribas la nomon de la ludo inter citiloj ĉar estis evidente ke ne temas pri manpilko, kvankam mi dum la sonĝo konsciis ke temas pri manpilko. Tion mi plu klarigos poste.

    Ĵus antaŭ la komenco de la ludo, montriĝis ke mankas unu kanada ludantino, kaj oni petis ke mi anstataŭu ŝin. Kompreneble estis evidente ke mi ne estas virino, interalie pro mia barbo, sed la sveda teamo senplende akceptis min kiel antsataŭanton. Eĉ en la realo mi ne memoras la regularon de manpilko, kiun mi ne ludis jam de multaj jaroj, sed en la sonĝo mi estis des pli senhelpa, ĉar la regularo estis tute absurda. Ĉiu teamo havis plene muntitan tendon (kredu, ne kredu!) sur sia duono de la ludsurfaco, kaj la celo de la ludo estis aŭ ĵeti etan korbopilkon en la kontraŭan korbopilkan celon, aŭ preni pecon de la kontraŭa tendo kaj ĵeti tion en la saman celon. Sed ĉe ĵeto de tendopeco, gravis ke la formo de la peco ŝanĝiĝu post la eliro el la manoj kaj antaŭ la eniro en la celon (ekz. ĉe ĵeto de faldita bastonaro, necesis ke ĝi malfaldiĝu). La ludantoj ne rajtis tuŝi la korbopilketon per la manplatoj, krom unu speciala ludanto kiun oni nomis “korbopilkisto”. La ceteraj ludantoj (inkluzive de mi) plej ofte batis la korbopilketon per la pugnoj.

    La regularon mi devis lerni per observado, ĉar oni ne klarigis ĝin al mi. Iel mi sukcesis, kaj mi komencis partopreni aktive en la ludado. Mi iom surpriziĝis, ĉar miaj samteamanoj plene inkluzivis min en la ludado, malgraŭ tio ke mi tute fuŝe ludis. Estis tute male kiam mi estis bazlernejano; ĉiu sciis ke mi estas la plej malbona ludanto, kaj ne volis riski mian partoprenon.

    Post la unua duono de la ludo, la svedinoj estis iom superintaj nin, sed ĵus antaŭ la komenco de la dua duono alvenis la ĝis tiam mankinta kanadanino. Dank’ al ŝia ĉeesto, la kanadaninoj en la fino venkis.

    Strangege, ĉu ne?

    Nuna humoro: konfuzita
    Nuna muziko: Chilly Bob - Need No Other

  • Konscia sonĝo

    Hodiaŭ matene mi por la unua fojo havis sonĝon, en kiu mi konsciis, ke temas pri sonĝo. En tiu sonĝo, mi ludis la bulgaran kartludon Belot (kiun mi lastatempe lernis) kun amuzulo kaj arono (sen kvara ludanto, malgraŭ tio, ke eblas ludi nur kvarope). En tiu ludo, ĉiu ludanto ricevas po ok kartoj, sed en la sonĝo mi havis ĉirkaŭ duoble tiom en la mano. Mi konstatis ke tio estas ioma strangaĵo, sed ne multe pripensis la aferon. Miaj kartoj estis tre bonaj, kaj mi certis ke mi gajnos. Dum mi ordigis ilin, mi rimarkis ke mi havas du karoajn naŭojn. Tio pli profunde pripensigis min, kaj post iom da cerbumado mi subite ekkomprenis: la neklarigeblaj nelogikaĵoj okazas, ĉar temas pri sonĝo! Mi tuj ekscitiĝis kaj fiere deklaris al miaj kunludantoj, “Mi konstatis, ke temas pri sonĝo! Mi konstatis, ke temas pri sonĝo!” Sed tuj evidentiĝis ke ne nur en la sonĝo mi krias tiujn vortojn – teodora aŭdis la vortojn kaj vekis min, pensante ke mi spertas inkubsonĝon.

    Nuna humoro: pripensema

  • Translokiĝo

    Kutime mi skribas almenaŭ unufoje semajne en mian taglibron, sed jam pasis monato depost mia antaŭa enskribo. Tio okazis pro pluraj kialoj, sed la plej grava estis mia translokiĝo al Otavo.

    Kiel mi klarigis jam en antaŭaj enskriboj, teodora trovis plentempan laborpostenon en Otavo, kaj pro tio necesis translokiĝi tien. Ni trovis tre belan apartamenton kiu troviĝas ege proksime al ŝia laborejo, kaj ekloĝis tie la 1-an de septembro. Kompreneble necesis multe da tempo por ĉion aranĝi, sed nun preskaŭ ĉio estas en ordo. Nur restas kelkaj malgrandaj aferoj por elskatoligi. Mi baldaŭ afiŝos kelkajn fotojn de nia nova loĝejo.

    Mi esperas fini mian disertaĵon (kaj tiel ankaŭ mian universitatan studadon) ene de la sekvaj 3-4 semajnoj, kaj pro tio mi devas ekserĉi laboron. Mi planas unue kandidatiĝi por registaraj postenoj, ĉar ili ja estas abundaj en Otavo, kaj cetere bone pagas kaj estas sufiĉe sekuraj. Mi esperas ke mi povos trovi mian vivresumon, kiun mi ne ĝisdatigis depost la jaro 2001!

    Nu, plej bone mi revenu al la disertaĵo nun.

    Nuna humoro: denove energioplena
    Nuna muziko: Four80East - Table For Two

  • Leteroj el mia pasinteco

    Mi iom post iom pretigas min por la translokiĝo al Otavo. Ĝenerale tio estas enuiga kaj laciga tasko, sed foje ne. Antaŭ kelkaj tagoj, dum mi purigis miajn ŝrankojn, mi trovis en skatolo stakon da paperoj, inter kiuj troviĝis leteroj de kvar korespondamikoj. La leterojn mi ricevis fine de 2001 kaj komence de 2002. Antaŭ ol foriri de mia universitata loĝejo en 2002, mi enskatoligis ilin, kaj evidente mi poste forgesis ilin. Du el ili mi eĉ ne estis forpreninta el la kovertoj! Hodiaŭ mi tralegis ĉiujn kaj sendis respondojn. Mi esperas ke la adresoj de miaj korespondamikoj daŭre estas validaj!

    Nuna humoro: nostalgia
    Nuna muziko: Merlin - Mi kredas

  • Nova kanto

    Mi komencis laciĝi je la disertaĵo, kaj do mi kreis kanton por min iom ripozigi. Mi eĉ elpensis nomon por ĝi: “Kion fari?”

    Denove temas pri rapide farita, kaj do tute ne polurita kanto. Sed almenaŭ ĝi sonas al mi pli bona ol la antaŭaj du. :-)

    Klaku ĉi tie por elŝuti la MP3-on!

    Nuna humoro: malstreĉa
    Nuna muziko: Argilo - Kion fari?

  • 00 Soul

    Hodiaŭ mi malkovris la muzikgrupon 00 Soul, dank’ al mencio en la funka komunumo de Orkut. Temas pri nuntempa grupo, sed la plejparto el iliaj kantoj estas ege 70-jarecaj. Mi tuj mendis ambaŭ iliajn KD-ojn, kune kun du KD-oj de Los Amigos Invisibles, kiujn mi menciis en mia hieraŭa enskribo. Ili rapide alvenu!

    Nuna humoro: funka funka funkega!
    Nuna muziko: 00 Soul - Hey Hey Hey

  • Naskiĝtago, nova apartamento, somerfesto, Los Amigos Invisibles, hajkoj

    La 15-an de junio mi festis mian 24-an naskiĝdatrevenon. Teodora donacis al mi la ĵus aperintan duan eldonon de la Kanada Oksforda Vortaro. Certe mi multe utiligos ĝin! Ĝis nun mi uzis usonan vortaraĉon, kiun mi ricevis kiel premion antaŭ multaj jaroj. Mi ankaŭ ricevis neatenditan donacon de mi mem: antaŭ monato mi mendis sakon por mia klavaro, kaj en tiu tago ĝi alvenis. Ankaŭ miaj gepatroj havas ian donacon por mi; tion mi ricevos ĉi-semajnfine kiam mi vizitos ilin.

    Kiel mi skribis antaŭe, teodora komencos labori kiel statistikisto por Statistics Canada meze de Septembro. La konstruaĵo de Statistics Canada troviĝas iom for de la urbocentro (de Otavo), kaj do ni decidis serĉi apartamenton en tiu regiono. Post kelkaj tagoj da serĉado ni trovis tre belan apartamenton, kiu troviĝas nur 300 metrojn for de la laborejo. Estos belege loĝi tie! Mi afiŝos kelkajn fotojn post la translokiĝo (kiu okazos komence de Septembro).

    Hieraŭ mi ĉeestis la Somerfeston de la Esperanto-Rondo de Toronto. Temas pri ĉiujara amika renkontiĝo sen ajna tagordo. Oni simple babilas, ludas, kantas, ktp. Ĉi-jare venis malpli da homoj ol pasintjare, sed inter ili estis sufiĉe da junuloj: mi, arono, Karlina, Ian, Stefano, kaj Liz. Verŝajne venos eĉ pli da junuloj al la somera pikniko de ERT, kiu okazos la 15-an de aŭgusto. Mi antaŭĝojas!

    Kiam mi pasintfoje estis en Toronto, mi iris al Kensington Market por serĉi vestaĵojn de la 70-aj jaroj. (Estas multaj tiaj vendejoj en tiu merkato.) Mi ne trovis ion aparte interesan tie, sed en unu vendejo mi aŭdis tre interesan diskoan kanton. Mi petis la nomon de la disko, kaj montriĝis ke temas pri “The Venezuelan Zinga Son Vol. 1” de “Los Amigos Invisibles”. Hodiaŭ mi aŭskultis kelkajn specimenojn, kaj tre ŝatis. Mi nepre mendos unu-du el iliaj KD-oj!

    amuzulo kaj mi lastatempe diskutis pri hajkoj:

    [22:05] Chuck Smith:

    hajkoj aĉegas
    mi ne povas toleri
    ili mortu tuj!

    [22:07] Clay314:

    vi pravegas, Chuck
    ni ekkontraŭbatalu
    tiujn aĉaĵojn!

    Nuna humoro: kreema
    Nuna muziko: Los Amigos Invisibles - Fonnovo

  • Gastlibra spamo, aĉ!

    Antaŭ kelkaj monatoj, mi decidis forigi la gastlibron de mia retejo, pro tio ke venis unu-du spamaj enskriboj ĉiutage, kaj preskaŭ neniam vera enskribo. Kaj kompreneble oni nun povas komenti en mia taglibro, kiu estas multe pli sekura kontraŭ spamistoj.

    Hieraŭ mi ricevis retpoŝtaĵon de iu, kiu rimarkis amason da spamaj enskriboj en la gastlibro de mia Skrablo-ludejo. Necesis multe da tempo por forigi ilin, ĉar estis centoj! Poste mi iom modifis la skripton, tiel ke ĝi limigu komentojn al unu kilobajto, kaj forigu HTML-markilojn. Espereble la spamistoj pro tio rezignos.

    Ĉiaokaze, kia ĝeno!

  • Elektorezulto

    Post la balotado, montriĝis ke la prognozo de electionprediction.org estis sufiĉe bona. Tie oni ĝuste prognozis la rezulton en 88% el la elektoregionoj. Tamen inter la restantaj 12% estis multaj regionoj, en kiuj prognozo favore al la NDP montriĝis malĝusta. Ŝajne multaj NDP-subtenantoj elektis la Liberalan Partion, por ke la Konservativa Partio ne venku. Jen estas la fina rezulto:

    • Liberala Partio: 135 (36.7%)
    • Konservativa Partio: 99 (29.6%)
    • Nova Demokratia Partio: 19 (15.7%)
    • Bloko Kebekia: 54 (12.4%)
    • Aliaj: 1 (5.6%)

    Por montri al vi, kiel stulta estas la kanada elektosistemo, mi skribis inter krampoj la kvanton de voĉoj, kiun ricevis ĉiu partio. La NDP ricevis pli da voĉoj ol la Bloko Kebekia, sed ricevis multe malpli da parlamentaj seĝoj. Tiel okazis pro tio ke la voĉoj por la Bloko Kebekia estas koncentritaj en unu provinco, dum la voĉoj por la NDP estas distribuitaj tra la tuta lando. Ni bezonegas proporcian sistemon!

    Nuna humoro: frustrita Nuna muziko: Arono - Resubiras Sama Suno

  • Elektoprognozo

    Antaŭ kelkaj minutoj, electionprediction.org prognozis la rezulton de la morgaŭa elekto:

    • Liberala Partio: 122
    • Konservativa Partio: 104
    • Nova Demokratia Partio: 29
    • Bloko Kebekia: 52
    • Aliaj: 1

    Hu ra! Se tiel okzaos, la NDP pli ol duobligos sian ĉeeston en la parlamento! (Nun ili havas nur 14 parlamentanojn.) Mi tamen esperas ke la Liberala Partio kaj la Nova Demokratia partio ricevos inter si almenaŭ kvar pliajn seĝojn, por ke ili povu formi koalicion!

    Nuna humoro: ekscitita

  • Pork Belly Futures

    Lastatempe en la kanada publika radio oni aŭdigis kelkajn kantojn el la laste aperinta disko “Way Past Midnight” de la kanada blusa grupo “Pork Belly Futures”. La unua (“Fictional World”) ne tre plaĉis al mi, sed la dua (“Way Past Midnight”) tuj eksorĉis miajn orelojn. Mi aparte ŝatis la piano-partojn, kaj eĉ la teksto plaĉis al mi, malgraŭ tio ke mi kutime ne atentas kantotekstojn. Hodiaŭ post la fino de la konferencaj prelegoj mi iris al strato Yonge por serĉi ĝin en la muzikvendejoj. (Troviĝas tuta amaso da ili sur tiu strato!) Feliĉe mi trovis ĝin en la dua vendejo, kaj mi tuj revenis hejmen por ĝin aŭskulti. Montriĝis ke la aliaj kantoj estas bonaj, sed ne same sorĉaj kiel “Way Past Midnight”, krom unu: “Gladstone Hotel”. Tamen povus esti ke iu alia kanto poste kaptos min. Ofte estas tiel, ke mi plej ŝatas unu-du kantojn el disko dekomence, sed post 10-20 aŭskultoj mi perdas intereson kaj en la fino preferas aliajn kantojn, kiujn mi komence ne ŝatis.

    Nuna humoro: mallaborema
    Nuna muziko: Pork Belly Futures - Way Past Midnight

  • Konferenco en Toronto

    Ĉi-semajne mi ĉeestas konferencon pri nombroteorio ĉe la Universitato de Toronto. Dume mi loĝas ĉe New College, kie mi fakte jam antaŭe loĝis dum mi ĉeestis junularan matematikan kongreson. Oni diris al mi ke nur studentoj de la Universitato de Toronto rajtas havi interret-aliron en sia ĉambro, sed evidente oni mensogis; mi simple ligis mian komputilon al la ingo en la muro, kaj montriĝis ke tute bone funkcias. Hu ra!

    Dimanĉon vespere mi ĉeestis renkontiĝegon por NDP-subtenantoj ĉe York Events Theatre. Venis Jack Layton, Ed Broadbent, kaj multaj el la kandidatoj por la elektoregionoj en kaj ĉirkaŭ Toronto. Laŭ mia takso, venis ĉirkaŭ milo da homoj. Ĉiuj tre ekscitiĝis dum parolis Jack kaj Ed!

    Hodiaŭ vespere mi ĉeestis renkontiĝon de la Esperanto-Rondo de Toronto. Entute ĉeestis 11 personoj. Inter ili estis kvar, kiujn mi antaŭe ne renkontis. Unu el ili estis de Bulgario, kaj do ni iomete interparolis en la bulgara. Post la renkontiĝo ni iris al la taja restoracio “Peach Garden”. La manĝaĵo estis tre bongusta! Entute mi tre ĝuis la renkontiĝon, kaj mi esperas ke mi baldaŭ povos ĉeesti pliajn.

    renkontiĝo de ERT

    Nuna humoro: denove energioplena

  • Aĉ!

    Korekti ekzamenojn estas aĉe!

    Nuna humoro: aĉa
    Nuna muziko: Interstate 77 Sound Track

  • Sendrata interreto en la kamparo

    Mi pensis ke miaj gepatroj ĉiam devos konekti al la interreto per modemo, sed ne plu! En la regiono Chatham-Kent, oni iom post iom konstruas sendratan reton, kiu ebligos al preskaŭ ĉiuj kamparanoj havi rapidan (1,5 mbps) interret-aliron. Kompreneble multaj homoj volas aboni la servon, kaj do necesas iom atendi. Hodiaŭ miaj gepatroj ricevis sian konekton, kaj ĝi bonege funkcias! Krome ili aĉetis sendratan enkursigilon, kaj do nun mi povas uzi mian porteblan komputilon ĉie ajn en la domo dum mi vizitas. Belege!

    Nuna humoro: imponita

  • Konto ĉe gmail.com

    Sendube multaj el vi aŭdis pri Gmail, nova retpoŝta servo de Google. La ĉefa diferenco inter Gmail kaj aliaj retpoŝtaj servoj (ekz. Hotmail kaj Yahoo) estas ke Gmail donas al ĉiu uzanto tutan GIGABAJTON da spaco. Krome, ne plu necesas organizi siajn retpoŝtaĵon per dosierujoj, ĉar Gmail havas tre bonan kaj rapidan serĉilon (ja temas pri Google, ĉu ne?).

    Gmail ankoraŭ estas en testa fazo, kaj do estas iom malfacile ekhavi konton. Funkcias tiel, ke ĉiu testanto povas inviti tri amikojn fariĝi testantoj. Mi mem ne konis testanton, sed mi sukcesis invitiĝi dank’ al gmailswap.com. Tie netestanto povas oferti ion, por ricevi inviton de testanto. Mi mem ofertis traduki mallongan tekston en Esperanton, kaj post du horoj mi ricevis inviton, kaj rakonteton por traduki. Evidente mia scipovo de Esperanto fariĝas pli utila ĉiutage. :-)

  • Jen mia unua komponaĵo!

    Finfine mi havis tute liberan vesperon, kaj do mi tuj kuris en la kelon por muzikumi. Mi iom post iom lernis kiel uzi mian muzikan softvaron (Cubase SX kaj Reason) dum mi kreis eksperimentan kanton.

    Klaku ĉi tie por elŝuti la MP3-on!

    Mi mem ludis kaj registris ĉion, krom la druma parto. Bonvolu komenti, por diri ĉu plaĉas al vi. Mi planas krei multe pli da muziko dum la venontaj semajnoj.

    Nuna humoro: funka
    Nuna muziko: Argilo - Unua eksperimento

  • Jam la dua...

    Jen estas la komenco de mia dua komponaĵo. (Mi finos ĝin morgaŭ. Ĝuste nun mi devas iom prilabori mian disertaĵon.)

    Klaku ĉi tie por elŝuti la MP3-on!

    Denove mi mem ludis kaj registris ĉion krom la druma parto. Ĝuu!

    Nuna humoro: dancema
    Nuna muziko: Argilo - Dua eksperimento

  • 2^24036583-1 estas primo!

    Komence de decembro, mi skribis pri nova rekorda primo. Sed jam tiu ne plu estas rekorda, ĉar oni ĵus malkovris primon eĉ pli grandan, nome 224036583-1, kiu havas 7235733 ciferojn! Mirige!

    Nuna humoro: matematika

  • Baldaŭ kanadanoj balotos!

    Hodiaŭ la ĉefministro anoncis ke okazos tutkanada balotado je la 28-a de junio. Jam de kelka tempo, oni supozis ke li anoncos tion, sed estis bone aŭdi tion rekte de li, ĉar ja restis iom da necerteco. Do nun oficiale komenciĝas la elektokampanjo.

    Mi tre ekscitiĝas, ĉar mia preferata partio (la Nova Demokratia Partio) nun havas la subtenon de ĉ. 18 procentoj el la kanadanoj, kompare al 9 procentoj dum la pasinta elektokampanjo. Cetere ŝajnas ke la Liberala Partio (nun la plej populara) eble ne gajnos duonon el la parlamentaj seĝoj, kio donus al la NDP multe pli gravan rolon. Mi esperas ke miaj kanadaj amikoj informiĝos pri la programoj de ĉiuj partioj, kaj pripensos subteni la NDP!

    Nuna humoro: energioplena

  • NDP-renkontiĝo en Otavo

    Ĉiumonate renkontiĝas subtenantoj de la Nova Demokratia Partio en diversaj urboj tra Kanado, simple por babili kaj amuziĝi. Mi jam ĉeestis du NDP-renkontiĝojn en Waterloo, sed hieraŭ mi unuafoje ĉeestis renkontiĝon en Otavo. Tiuj en Waterloo estis tre sukcesaj, sed Otavo estas multe pli granda urbo, kaj do ĉeestas pli da homoj. Hieraŭ venis ĉirkaŭ 25.

    Kia tago por renkontiĝo! Lastatempe mortis la provinca parlamentano por la regiono Hamilton East, kaj tial okazis hieraŭ balotado por elekti novan parlamentanon. Dum la pasintaj dek jaroj, reprezentis tiun regionon membro de la Liberala Partio, sed hieraŭ la NDP venkis per du trionoj el la voĉoj! Kompreneble ni festegis kiam ni aŭdis tiun novaĵon! Tiu venko aparte gravas por la NDP ĉar ili bezonis unu plian parlamentanon por regajni oficialan partian statuson.

    Entute la renkontiĝo estis tre amuza, kaj mi certe ĉeestos la sekvan, se mi tiam estos en Otavo.

    Nuna humoro: ekscitita
    Nuna muziko: Jammin (Emagic EVB3 demo song)

  • Al Otavo kaj reen

    Je la 1-a de majo Teodora kaj mi iris al Otavo. Ŝia nova apartamento tie estas tre bela! Ĝi estas sur la 18-a etaĝo, kaj do eblas vidi grandan parton de la urbo. Eĉ eblas vidi la apartamenton de arono, kiu troviĝas tri kilometrojn for. Teodora ne havos interret-aliron ĝis ĵaŭdo, sed mi tamen sukcesis interretumi dum mi estis tie, dank’ al tio ke iu en apuda apartamento ne sekurigis sian sendratan reton. :-)

    Hieraŭ mi revenis al Waterloo. Ĝuste nun mi sidas ekstere, legante teknikajn raportojn kiuj rilatas al mia disertaĵo, kaj ĝuante la finfine alvenintan printempan veteron.

    Nuna humoro: malstreĉa
    Nuna muziko: Four80East - Table For Two

  • Vizito al la gepatroj

    De merkredo ĝis vendredo mi vizitis miajn gepatrojn. Mi alportis miajn komputilon, sonkarton, kaj klavaron, por ke mi povu fari iom da muziko kun mia patro. Tio tamen ne okazis, pro tio ke mia patro multe okupiĝis pri la pligrandigo de la domo.

    Jam de kelka tempo, miaj gepatroj planis pligrandigi sian domon. Je la 19-a de aprilo komenciĝis la konstruado, kaj mi vidis dum mia vizito ke ĝi tre bone progresas! Verŝajne ĉio pretos post 6-8 semajnoj. Pligrandiĝos la kuirejo, kaj aldoniĝos kelkaj ĉambroj (interalie bilardejo!) kaj aŭtomobilejo. Estos tre bele!

    Dum la vizito mi trovis plian geografian kaŝejon kun mia fratino. Denove ni vidis en la libreto ke ŝia amiko estis trovinta la kaŝejon nur kelkajn tagojn antaŭ ni! Restas pliaj proksimaj kaŝejoj, do certe ni serĉos ilin dum postaj vizitoj.

    Post kelkaj horoj mi ekiros al Otavo kun Teodora. Ni devas alporti ŝiajn aferojn, ĉar ŝi translokiĝas tien. Ŝi eklaboros je lundo en la Departemento de Financo. Dume mi restos en Waterloo por fini mian disertaĵon, sed mi kompreneble venos tre ofte al Otavo. Espereble ni povos multe amuziĝi kun arono, Karlina, kaj Nirgle!

    Nuna humoro: laca
    Nuna muziko: Where Now?? (wherenow.mod)

  • Lastatempaj okazintaĵoj

    La pasintaj semajnoj por mi estis ege frenezaj! Pro tio mi nenion afiŝis lastatempe. Do mi rakontu pri ĉiuj lastatempaj okazintaĵoj.

    Je la 27-a de marto mi iris hejmen por viziti mian familion. Mia fratino tre interesiĝis pri Geocaching, kaj do ni kune serĉis kaj trovis proksiman geografian kaŝejon. Ĉiu, kiu trovas kaŝejon, devas skribi sian nomon kaj mallongan mesaĝon en libreton. Mia fratino tre surpriziĝis, kiam ŝi vidis ke ŝia amiko estis la lasta persono, kiu trovis la kaŝejon!

    Post mia reveno al Waterloo, mi rigardis la horaron de la universitata radiostacio, kaj rimarkis ke ili nun dissendas programon pri funko, kaj similaj muzikstiloj. Ĝi nomiĝas “The Tongue & Groove Show”, kaj aŭdiĝas ĉiun duan semajnon. Mi tre ĝuis la pasintan elsendon. Morgaŭ aŭdiĝos la sekva, pri kiu mi kompreneble tre ekscitiĝas.

    Je la 3-a de aprilo, Teodora kaj mi iris al Otavo por serĉi apartamenton. Teodora laboros por la Departemento de Financo de majo ĝis aŭgusto, kaj do bezonas loĝlokon. Krome ŝi ĵus aŭdis de Statistics Canada, ke ili volas dungi ŝin! Do ŝi plej verŝajne eklaboros por ili en septembro. Mi do venos al Otavo post mia magistriĝo. Dum ni estis en Otavo, ni tranoktis ĉe arono kaj Karlina. Estis tre amuze, viziti ilin denove!

    Dum la pasinta semajno mi laboregis por fini mian lastan projekton por mia lasta kurso. Hieraŭ mi finis ĝin, kaj sendis ĝin al la profesoro. Hu ra! Krome mi devis prepari prelegon, kiun mi hodiaŭ prezentis al la kriptografia studgrupo ĉe la universitato. Mi bedaŭras, ke mi ne havis pli da tempo por prepari pli bonan prelegon, sed jam mi aŭdis bonajn reagojn de du ĉeestantoj, do eble ne estis tiel malbone. ;-)

    Lastatempe mi ekvolis krei propran muzikon. Dank’ al moderna muzika softvaro, necesas nur rapida komputilo kaj bonkvalita sonkarto por tion fari. Post iom da esplorado, mi decidis aĉeti la sonkarton Omni Studio de M-Audio. Mi mendis ĝin de loka muzika vendejo, kaj espereble ĝi alvenos ĉisemajne. Se mi sukcesos krei ion bonan, mi certe tion disponigos MP3-formate en mia retejo.

    Nuna humoro: sukcesa
    Nuna muziko: Lindsay Lohan - Drama Queen

  • Jack Layton venis al la universitato!

    El politika vidpunkto, la studentaro de mia universitato estas sufiĉe dekstrema. La studenta gazeto ĉiam estas plena je artikoloj verkitaj de dekstremuloj, kiuj pledas por privatigo de sociaj servoj, impostomalaltigoj, pli da integriĝo kun Usono, ktp. Krome estas tre aktivaj studentaj sekcioj de la provinca kaj landa konservemaj partioj.

    Vere mankis voĉo por la maldekstro ĝis la kreo, antaŭ du monatoj, de studenta sekcio de la Nova Demokratia Partio, la plej granda maldekstra partio de Kanado. Mi iom miris kiam mi vidis la reklamafiŝojn de la nove kreita klubo kaj, estante subtenanto de la Nova Demokratia Partio jam de pluraj jaroj, tuj aliĝis.

    Vere mirigas min, kiom bone jam progresas la agado de nia klubo. Antaŭ du semajnoj, ni pripensis inviti iun parlamentanon al la universitato por fari publikan prelegon. Ni kontaktis la partion por tion peti, kaj atendis respondon. Antaŭ semajno ili respondis ke Jack Layton, la estro de la partio, vizitos kelkajn proksimajn urbojn, kaj ŝatus prelegi ankaŭ en nia universitato. Kia surprizo! Ni eĉ ne supozis ke ni sukcesos venigi parlamentanon, kaj jen ni aŭdis ke venos la partiestro!

    Ni ne havis multe da tempo por prepari nin al tio, sed ni iel sukcesis. Ni tuj produktis afiŝojn, kontaktis la amaskomunikilojn, rezervis lokon por la prelego, ktp. Kaj hodiaŭ ĉio perfekte funkciis. Venis granda homamaso, kiu atente aŭskultis kaj multe aplaŭdis la prelegon. Poste la ĉeestantoj starigis plurajn interesajn demandojn. Mi mem tre ĝuis la eventon!

    Nuna humoro: kontenta
    Nuna muziko: Modjo - Lady

  • Feliĉan pi-tagon!

    La dato kaj horo nun estas 2004-03-14 01:59:26, do festu ni la tagon de la famekonata numero pi! Jen estas ĝiaj unuaj 1000 ciferoj:

    3.141592653589793238462643383279502884197169399375105820974944592307816406286
    20899862803482534211706798214808651328230664709384460955058223172535940812848
    11174502841027019385211055596446229489549303819644288109756659334461284756482
    33786783165271201909145648566923460348610454326648213393607260249141273724587
    00660631558817488152092096282925409171536436789259036001133053054882046652138
    41469519415116094330572703657595919530921861173819326117931051185480744623799
    62749567351885752724891227938183011949129833673362440656643086021394946395224
    73719070217986094370277053921717629317675238467481846766940513200056812714526
    35608277857713427577896091736371787214684409012249534301465495853710507922796
    89258923542019956112129021960864034418159813629774771309960518707211349999998
    37297804995105973173281609631859502445945534690830264252230825334468503526193
    11881710100031378387528865875332083814206171776691473035982534904287554687311
    59562863882353787593751957781857780532171226806613001927876611195909216420199
    
  • Hejmtaskeg'... kaj preleg'!

    En mia kurso pri kombinatoriko, ĉiu studento devas prezenti 45-minutan prelegon. Fakte estas tiom da studentoj, ke la profesoro apenaŭ devos prelegi! Mi ricevis iom malfacilan temon, do mi devis dum pluraj tagoj min prepari. Sed en la fino ĉio bone funkciis. Mi prezentis la prelegon je lundo, kaj poste la profesoro gratulis min pro mia tre bona prezento.

    Mi ankaŭ estis tre okupata lastatempe pro tre granda hejmtasko por tiu sama kurso. Mi devis priesplori temon kaj verki 15-paĝan raporton pri ĝi. Tio postulis multe pli da tempo ol mi supozis… mi ja laboregis dum mia tuta libera semajno, eĉ dum mi vizitis miajn gepatrojn! Jen estas la rezulto.

  • Toronto

    Hodiaŭ mi iris al Toronto por ĉeesti renkontiĝon de la Esperanto-Rondo de Toronto. Ĉifoje ĉeestis malpli da personoj ol pasintfoje – Detlef Karthaus, Ken Price, Kathy Toy, Paul kaj Maria Hopkins, kaj mi. Mi telefonis al Mateo, sed li diris ke li ne povas veni ĉar li laboris tre multe dum la semajno kaj volas pasigi iom da tempo kun sia koramiko. Espereble li ĉeestos la martan renkontiĝon, ĉar estas pli agrable ne esti la sola junulo. :-)

    Nuna humoro: malstreĉa
    Nuna muziko: Down To The Bone - Muesli Brown

  • Tute sendrate

    Hieraŭ mi movis la komputilojn de Teodora kaj mi al la supra etaĝo de nia apartamento. Sed la kablo-modemo devis resti malsupre, longe for. Mia komputilo sendrate konektas, sed tiu de Teodora ne. Do hodiaŭ mi aĉetis sendratan retkarton por ŝia komputilo, kaj nun nia tuta domo funkcias sendrate. Mi ĵus enskatoligis 20 metrojn da eksmodiĝintaj dratoj. :-)

    Nuna humoro: imponita

  • Finfine!

    Tempo: 08:00 EST Temperaturo: 0.059 °C

    Kaj oni prognozas temperaturon de 2 °C hodiaŭ!

    Nuna humoro: ekscitita

  • Ĉu pli da "Down To The Bone"?

    Hodiaŭ mi denove aŭskultis ĵazan radiostacion, kaj denove aŭdis muzikpecon kiu sonis kiel kanto de Down To The Bone. Sed ĉifoje oni anoncis ke temas pri la kanto “Club Charles” de la grupo “Bona Fide”. Mi eĉ ne aŭdis pri tiu grupo ĝis hodiaŭ! Mi iom esploris ĉe Amazon kaj trovis du iliajn KD-ojn, kiujn mi verŝajne mendos. Ilia stilo vere similas al tiu de Down To The Bone, kaj iliaj kantoj estas bonegaj!

    Nuna humoro: ekscitita
    Nuna muziko: Bona Fide - Club Charles

  • Bonega Air Farce

    Nepre spektu “CNN Newsnight: Marketing in Iraq”, “Stan’s Department of Homeland Security”, kaj “Martin Meets Bush” el la plej lasta Air Farce. Vi multe ridos!

  • Brrr...

    Jam de 25 tagoj la temperaturo restadas sub 0 gradoj. Kiam venos printempo?

    Nuna humoro: malvarma

  • Cellar Funk

    Hodiaŭ mi aŭskultis ĵazan radiostacion, kaj aŭdis tre bonan kanton, ege funkecan. Post kelkaj sekundoj mi konkludis ke devas esti kanto de Down To The Bone, unu el miaj preferataj muzikgrupoj. Sed mi jam havas ĉiujn iliajn diskojn! Reveninte hejmen, mi malkovris ke temas pri la kanto “Cellar Funk” (Kela Funko) de la baldaŭ aperonta samnoma disko. Mi jam antaŭmendis ĝin, kune kun la plej lasta disko de Rick Braun, kies nomo koincide estas “Esperanto”. Ankaŭ tiu disko enhavas kelkajn tre funkecajn kantojn.

    Nuna humoro: funka
    Nuna muziko: Flip-Flop-Hip-Hop (flipflop-hiphop.mod)

  • Novaj KD-oj

    De tempo al tempe venas brokantisto al la universitato por vendi KD-ojn. Ĉifoje mi iris al lia budo kaj aĉetis la jenajn kvar KD-ojn kontraŭ tre favora prezo.

    • “Soulive” de Soulive
    • “Mo’ Roots” de Maceo Parker
    • “Southern Exposure” de Maceo Parker
    • “Blue Mode” de Reuben Wilson

    Aŭskultinte ĉiujn, mi tre ĝojas ke mi elektis ĝuste ilin! Ili ĉiuj estas bonegaj, kaj vekas en mi inspiron komponi propran muzikon.

    Nuna humoro: kontenta
    Nuna muziko: Reuben Wilson - Blue Mode

  • Vizito al Toronto

    Je sabato, mi vojaĝis al Toronto por ĉeesti la januaran “bibliotekan studrondon” de la Esperanto-rondo de Toronto. En la vero ne temas pri studrondo; oni simple babilas kaj manĝas. Ĉifoje ĉeestis pli ol dek personoj, inter kiuj estis mia amiko Mateo kaj lia koramiko Jay, kiujn mi ne vidis depost la somero.

    La ĉiumonataj studrondoj okazas en la apartamento de Detlef. Mi vere miris, kiom proksime li loĝas al mi. Li loĝas en tre okcidenta parto de Toronto, kaj mi en tre orienta parto de Waterloo. Dank’ al tio, mi sukcesis vojaĝi tien dum nur 50 minutoj. Do ekde nun mi planas ĉiumonate ĉeesti!

    Nuna humoro: kontenta
    Nuna muziko: Morgan Finlay - In A Perfect World

  • La unua tago

    Hodiaŭ estis la unua tago de la vintra studperiodo. Ĉifoje mi sekvos nur unu kurson, fakte mian lastan. Komence mi ĉeestos kelkajn kursojn, sed verŝajne mi elektos tiun pri “combinatorial designs”. (Ĉu iu scias, kiel diri tion en E-o? “Design” estas finia aro kune kun speciala kolekto de ties subaroj.)

    Mi ĉeestis tiun kurson hodiaŭ, kaj eksciis ke ĝi estos sufiĉe nekutima. Ne estos ekzamenoj, nek tradiciaj hejmtaskoj. Oni simple devos fari tri projektojn, kiuj ŝajnas tre interesaj. Interalie oni devos iom priesplori nesolvitajn problemojn. Ĝis merkredo oni devas iom eksperimenti pri la bazaj “design”-oj, do mi eku nun pri tio. :-)

    Nuna humoro: malsata
    Nuna muziko: Down To The Bone - Yo Mama’s So Phat

  • Mi havas aŭton!

    Lastatempe mi ekvolis havi aŭton, interalie pro tio ke la aŭtobusa sistemo ĉi tie estas apenaŭ uzebla. Do dum la julaj ferioj mi serĉis aŭton kun mia patro. Ni pripensis la t.n. “Matrix” de Toyota. Ni iris al la Toyota-vendejo en Chatham, kaj tie vidis tri. Du estis ĉijaraj modeloj, sufiĉe kutimaj, kaj la tria estis pasintjara modelo, fakte la plej luksa (la t.n. XRS), kiun oni vendis kontraŭ tre favora prezo. Mi provis ĝin kaj tuj enamiĝis. Kaj post nelonge, ĝi fariĝis mia aŭto. Hu ra!

    Certe temas pri taŭga aŭto por matematikisto, unue pro la nomo (Matrix = matrico), kaj due pro tio ke estas primo (nome 971) sur la numerplato. :-)

    Toyota Matrix XRS

  • Saluton de Chatham

    Ĉifoje mi skribas el la hejmo de miaj gepatroj, kiu troviĝas proksime al la urbo Chatham. Mi vojaĝis tien ĉivespere kun mia patro, kaj tie restos dum la kristnaskaj ferioj.

    Estas bele, denove esti kun la gepatroj. La nura problemo estas la manko de interretaliro. Mi povas konekti per modemo, sed nur vespere kiam ne estas risko, ke iu telefonos.

  • Finiĝis la ŝvitad'

    Post du semajnoj da ekzamenoj kaj projektoj, mi ĵus finis la lastan projekton. Mi do estos libera ĝis la komenco de januaro. Hu ra!

    Nuna humoro: malstreĉa
    Nuna muziko: Merlin - Estis unu fojo

  • 2^20996011-1 estas primo!

    Je la 17-a de novembro iu GIMPS-ano malkovris rekordan primon. Dum la sekvaj du semajnoj oni konfirmis ĝin, kaj finfine oni hodiaŭ anoncis la nombron, nome 220996011-1, kiu havas 6320430 ciferojn! Nekredeble!

    Nuna humoro: ekscitita

  • Kion pensas kanadanoj pri Usono?

    La respondon vi trovos en la plej lasta Air Farce. Nepre spektu “Bush Visits Blair”!

  • Mi aĉetis iPizujon!

    Antaŭ kelkaj tagoj mi aĉetis iPod-on, kion Arono kaj mi ŝerce nomas iPizujo. :-) Mi devis ŝvite labori por organizi mian MP3-kolekton, sed nun farinte tion, mi povas tute facile trovi kaj aŭskulti iun ajn el miaj kantoj!

    Komence mi uzis la inkluzivitan programaĉon “musicmatch” por organizi mian muzik-kolekton, sed poste mia amiko Janko menciis al mi ke jam ekzistas vindoza versio de iTunes, kiun mi tuj instalis. Ĝi funkcias multege pli bone!

    Nuna humoro: malsata
    Nuna muziko: Daft Punk - Voyager

  • Ĉu nova rekordo?

    Antaŭ nur du semajnoj, mi prelegis pri tio, kiel trovi grandegajn primojn. Kaj tute koincide, oni plej verŝajne malkovris antaŭ tri tagoj novan rekordan primon! Mi skribas “plej verŝajne” pro tio ke oni ankoraŭ devas konfirmi ĝin per alia komputilo kaj programo. Tion oni nun faras, kaj post la konfirmo oni anoncos la nombron kaj la malkovrinton. Ĝis nun oni anoncis nur ke la nombro havas inter 5 kaj 10 milionojn da ciferoj. Tio signifas ke ĝi estos la plej granda konata primo, sed ke ĝi ne estos sufiĉe granda por gajni la grandegan premion por primo kun 10 milionoj da ciferoj. Primon tiel grandan oni plej verŝajne malkovros nur post kelkaj jaroj.

    Se vi volas per la propra komputilo serĉi grandegajn primojn, mi rekomendas viziti la retejon de GIMPS. Tie eblas legi pli pri la projekto, kaj elŝuti senkoste la necesan programon.

    Nuna humoro: ekscitita
    Nuna muziko: Headhunters - Straight From The Gate

  • Kiel traduki "root beer"?

    Ĉi tie mi listigis ĉiujn seriozajn proponojn, kiujn mi ĝis nun aŭdis. Ni vidu, kiun vi preferas!

    Poll #204412

  • Revenis Radio Verda

    Radio Verda estas interreta radio-stacio kiun kreis mia amiko Aaron Chapman (Arono). Bedaŭrinde ĝi malaperis antaŭ du jaroj, sed nun eblas reaŭskulti la malnovajn programojn dank’ al ĵus aperinta arĥivo de ĉiuj programoj.

    Nuna humoro: produktema
    Nuna muziko: Graham Central Station - Water

  • Ĉu smilakradikaĵo?

    Hodiaŭ Arono, Erinja, kaj mi serĉis tradukon de la angla vorto “root beer”. Aperis kelkaj proponoj, interalie “sarsparilaĵo”, “rutbiro”, kaj “radikbiero”. Vidinte la unuan, mi serĉis “sarsaparilla” en mia angla-Esperanta vortaro, kaj trovis “smilakradik-o, -aĵo”. Laŭ mia kompreno, “sarsaparilla” estas sinonimo de “root beer”, do mi pensas ke “smilakradikaĵo” estas perfekta traduko de “root beer”. Kion pensas vi?

    Nuna humoro: sukcesa
    Nuna muziko: Graham Central Station - The Jam

  • Kiel trovi grandegajn primojn

    Kadre de miaj studoj, mi hieraŭ devis fari 20-minutan prelegon pri iu matematika temo. Mi decidis klariri, kiel trovi grandegajn primojn. Primo estas nombro, kiun eblas dividi nur per si mem kaj per la nombro unu, ekz. 2, 3, 5, 7, 11… Ĝuste nun, la plej granda konata primo estas 213466917-1, kiu havas 4053946 ciferojn!

    Estas sufiĉe facile trovi malgrandajn primojn, sed oni devas uzi komplikajn matematikajn rimedojn por trovi rekorde grandajn primojn. Tiujn rimedojn mi klarigis en mia prelego. Mi ĵus tradukis la notojn de la prelego en Esperanton kaj afiŝis ilin en mia retejo.

    Mi bonvenigas ĉiajn komentojn pri mia uzo de la matematika terminologio! Mi ĝis nun ne skribis multe pri matematiko en Esperanto, do povus esti eraroj.

    Nuna humoro: kreema
    Nuna muziko: Marc Broussard - Momentary Setback

  • Mapo

    Mi provas marki la lokojn de miaj amikoj sur ĉi tiu mapo. Bonvolu marki vian lokon per la jena formularo.

    Uzanto-nomo:

    (Poste faru la samon por viaj amikoj!)

    Nuna humoro: suspir’
    Nuna muziko: Stardust - Music Sounds Better With You

  • Laboreg'

    Mi ĵus finis 24-paĝan hejmtaskon pri nombroteorio. Morgaŭ mi devos fari sufiĉe longan hejmtaskon pri kombinatorika nombrado. Ve! Espereble mi sukcesos fini ĝin. Poste mi finfine havos tempon por skribi pli multe en mia taglibro.

    Nuna humoro: laca
    Nuna muziko: Aaron Chapman - Renaskiĝ

  • Freneze okupata

    Nun mi estas freneze okupata, pro mia studado. Mi devas ĝis ĵaŭdo prepari skizon de estonta projekto, ĝis vendredo fini unu grandan hejmtaskon, kaj ĝis lundo fini eĉ pli grandan. Krome, mi devos venontsemajne fari 20-minutan prezenton pri grandaj primoj, kaj kompreneble mi devas prepari min al tio. Pro tio miaj enskriboj estas aparte maloftaj ĝuste nun. :-)

    Mi tamen havas kelkajn liberajn minutojn nun, do mi skribu pri kelkaj lastatempaj okazintaĵoj. Pasintan vendredon alvenis pakaĵo por mi. Kiam mi prenis ĝin, mi eksciis ke temas pri kelkaj KD-oj, kiujn mi mendis de Cyberseekers. La KD-oj estas kontraŭleĝaj registraĵoj de koncertoj de Herbie Hancock. Mi jam havas ĉiujn laŭleĝajn registraĵojn de lia funkmuziko, do nun mi devas min turni al aliaj fontoj por aŭdi pli.

    Ankaŭ en tiu tago alvenis mia nova klavaro. La sekvan tagon, mi iris al Toronto kun Teodora por preni ĝin. Mi tre ŝatas ĝin! Ĝi perfekte imitas ne nur la klavarojn de la 70-aj jaroj, sed ankaŭ la efektilojn de tiu periodo. Mia preferata estas la t.n. va-va-ilo, kiun multaj muzikistoj uzis (kaj daŭre uzas) kun klavineto. Eble mi iam registru ion, por ke vi povu aŭdi, kian muzikon mi ludas.

    Nu, min atendas la hejmtaskegar’, do mi revenu al tio. Ĝis poste!

    Nuna humoro: okupata

  • JND

    Antaŭ kelkaj monatoj, mi elŝutis de MP3.com kelkajn MP3-ojn de la muzikgrupo JND. Hodiaŭ mi aŭskultis ilian kanton “Song Life”, kaj ekemis aĉeti ilian KD-on. Post mallonga serĉo mi trovis ilian retejon, kaj legis tie ke ili jam produktis tri KD-ojn. Mi aŭskultis kelkajn specimenojn, kaj tuj decidis mendi ĉiujn tri.

    La muziko en la unuaj du KD-oj estas tre plaĉa miksaĵo de funko kaj ĵazo. Mi aparte ŝatas la klavarajn partojn kaj la kantadon. Kiel kutime, mi ne multe atentas la tekstojn, sed mi ŝatas la kantadon pro tio ke ĝi kutime rolas kiel instrumento en la kantoj. La tria KD sonis multe pli rokeca, sed mi decidis malgraŭ tio aĉeti ĝin. Ne estis specimenoj de ĉiuj kantoj, kaj do povus esti iu tre interesa kanto en la disko.

    Mi aparte ŝatas la kanton River 101, kies specimenon mi nun aŭskultadas!

    Nuna humoro: okupata
    Nuna muziko: JND - River 101

  • Skype

    Hodiaŭ mi elŝutis kaj provis la programon Skype, kiu ebligas voĉe babili tra la interreto. Antaŭe mi provis kelkajn tiajn programojn, sed ili aŭ havis malbonan sonkvaliton aŭ ne funkciis malantaŭ enkursigilo aŭ fajroŝirmilo. Sed Skype senprobleme funkcias en tiaj situacioj, kaj krome provizas tre bonan sonkvaliton. Per ĝi mi babilis jam kun miaj amikoj Filbar kaj iskander9999, kun kiuj mi ne tiel ofte babilas voĉe pro altaj telefonkostoj. Se vi volas babili kun mi, simple elŝutu la programon kaj alvoku min per la ligilo. Aŭ se la ligilo ne funkcias, simple entajpu mian salutnomon, “argilo”.

    Nuna humoro: dormema
    Nuna muziko: Interstate 77 Soundtrack - 15

  • Renovigado

    Dum almenaŭ unu jaro mi tute ne ĝisdatigis mian personan retejon, Tereno de Argilo. Hodiaŭ mi havis iom da libera tempo, do mi decidis finfine fari tion. Mi ne nur ĝisdatigis ĝin; mi tute renovigis ĝin!

    Rilate la stilon, mi volis ion, kiu bone respegulos mian fortan intereson pri funk-muziko. Tial mi komencis per eta grafikaĵo de la grafika elmontro-programo Just a touch of funk. Mi metis ĝin komence kaj fine de ĉiu paĝo, kaj uzis ties kolorojn por la teksto kaj fono.

    Mi decidis uzi mian taglibron kiel komencpaĝon, por ke ĉiam estu io nova kaj (espereble) interesa en la retejo. Mi aldonis etan informpaĝon, kaj provizore forigis ĉiujn aliajn paĝojn. Mi iom post iom renovigos ilin kaj ligos ilin al la nova retejo, sed ili provizore estos atingeblaj per siaj malnovaj adresoj, por ke ne rompiĝu ligiloj de eksteraj retejoj.

    Se vi havas ideojn aŭ proponojn pri la retejo, nepre komentu per la suba ligilo.

    Nuna humoro: funka
    Nuna muziko: L.A. Connection - Shake It

  • En Toronto

    Hieraŭ mi iris al Toronto kun teodora por viziti ŝiajn geavojn. Ili preparis tradician bulgaran tagmanĝon, kiu estis ege bongusta. Estis tre interese provi por la unua fojo manĝaĵojn, pri kiuj mi ĝis nun nur legis. Krome mi havis ŝancon ekzerci min en la bulgara, ĉar oni parolis la bulgaran dum preskaŭ la tuta vizito. Mi ne komprenis ĉion, sed almenaŭ la plejparton, kaj mi eĉ sukcesis iom kontribui al la konversacioj.

    La bulgara tamen ne estas la nura lingvo, kiun oni uzis. Dum ni manĝis, la avo de Teodora demandis al mi, en perfekta Esperanto, “Ĉu vi parolas Esperanton?” Mi senpense respondis ke jes, kaj li poste levis sian glason, kaj demandis al mi, “Kio estas tio ĉi?” Mi respondis ke temas pri glaso, samtempe konstatante ke ni ne plu parolas en la bulgara. Montriĝis ke li studis Esperanton kiel bazlernejano dum la 40-aj jaroj, kaj memoris nur tiujn du frazojn. Evidente li tre amuziĝis pri tio, ke li povas denove utiligi tion, kion li lernis antaŭ tiom da tempo! Li diris ke mi plu studu la bulgaran, kaj ke li plu studos Esperanton, por ke ni povu pli bone lingvumi dum la sekva vizito. :-)

    Dum mia tempo en Toronto, mi iris ankaŭ al muzikinstrumenta vendejo por aĉeti novan klavaron, nome Nord Electro 2, pri kiu mi skribis en antaŭa enskribo. Oni havis tian klavaron en la vendejo, sed ĝi aspektis iom uzita, do mi petis ke oni mendu novan rekte de la fabriko. Ĝi alvenos post unu-du semajnoj. Mi multe antaŭĝojas! Finfine mi havos klavaron en mia apartamento, do mi ne plu devos iri al la universitato por ludi pianon, aŭ atendi la finon de la studperiodo por uzi la pianon de miaj gepatroj.

    Nuna humoro: ekstaza
    Nuna muziko: Brian Tarquin - Third Stone From The Sun

  • Iom-post-ioma alkutimiĝo

    Jam de unu monato mi estas postbakalaŭra studento, kaj mi iom post iom alkutimiĝas al tio. Ankoraŭ ne pretas mia tute nova oficejo, sed intertempe oni movis min al alia oficejo, kiu almenaŭ havas sufiĉe da skribotabloj kaj komputiloj por tri studentoj (antaŭe mi estis kun du aliaj studentoj en oficejo por du).

    Mi agas kiel instru-helpanto por du klasoj, kaj kadre de tio mi devas instrui dum du horoj semajne, kaj helpi al individuaj studentoj dum du pliaj horoj. Komence mi iom nervoziĝis dum la instruado, sed mi jam preterlasis tion. Krome mi havas tre bonan rilaton kun la studentoj, kaj iom post iom ekkonas ilin. Mi tamen plej ŝatas la individuan helpadon, ĉar estas vere miriga sperto vidi ke oni ekkomprenas ion dank’ al mia klarigo.

    Mi finfine decidis, ĝuste kiujn kursojn mi sekvos dum la aŭtuno. Ili estas pri kombinatorika nombrado, kriptografia kalkulado, kaj analitika nombroteorio. Jam mi devis fari unu grandegan hejmtaskon por la kurso pri nombrado, sed por la aliaj kursoj tute ne estos hejmtaskoj. Por la kurso pri kriptografia kalkulado mi devos fari projekton, kaj por tiu pri nombroteorio estos du longegaj ekzamenoj, kiujn oni faros hejme.

    Krom tio, mi devas fari kelkajn aliajn taskojn. Ekzemple, mi venontsemajne devos helpi pri administrado de iu ekzameno. Kaj komence de novembro mi devos fari 20-minutan prezenton pri iu matematika temo. Verŝajne mi prelegos pri trovado de grandegaj primoj. Mi afiŝos pliajn informojn pri tio poste.

    Nuna humoro: okupata
    Nuna muziko: Keep Forgetting - Michael McDonald

  • Ankoraŭ pri mia studado

    Hieraŭ mi reiris al la universitato por pritrakti ankoraŭ kelkajn aferojn. Oni donis al mi oficejon en la matematika konstruaĵo, kiun mi devos dum kelkaj tagoj dividi kun du aliaj studentoj. Poste mi translokiĝos al tute nova oficejo, sed mi ne scias ĉu mi dividos ĝin kun aliaj. Poste mi parolis kun profesoro pri eblaj kursoj por la aŭtuna studperiodo. Mi devas sekvi tri kursojn, sed estas pluraj, kiuj interesas min. Komence mi vizitos ĉiujn, kaj tiel mi povos pli facile elekti. Feliĉe postbakalaŭraj studentoj ne devas frue elekti siajn kursojn.

    Hodiaŭ finfine ekfunkciis la interret-konekto en nia domo, do mi povos multe pli facile skribi en mia taglibro ekde nun. Verŝajne mi skribos multe dum la sekvaj tagoj pri miaj kursoj kaj aliaj devoj ĉe la universitato. Postbakalaŭra studado ankoraŭ estas por mi sufiĉe mistera afero!

    Nuna humoro: gaja
    Nuna muziko: Con Funk Shun - Chase Me

  • Komenco de nova fazo

    Hodiaŭ mi iris al la universitato por ĉeesti seminarion por ĉiuj novaj postbakalaŭraj studentoj en la matematika fakultato. La seminario ne estis aparte interesa, sed estis interese renkonti la aliajn studentojn, kiuj apartenas al la sama departemento kiel mi (nome la Departemento de Kombinatoriko kaj Optimumigado).

    Dum la sekva jaro mi en tiu departemento studos kriptografion. Mia gvidanto dum la magistriĝo estos Edlyn Teske, kiu cetere estas Esperantisto kaj iama estrarano de TEJO.

    Ĝis nun ŝajnas tre bone, esti magistra studento. Oni ricevas sufiĉan monon por pagi la stud- kaj loĝ-kostojn, kaj oni havas plurajn privilegiojn, kiujn oni ne havas kiel bakalaŭriĝanto. Sed kompreneble estas kelkaj ĝenoj. Ekzemple, oni devas kontroli hejmtaskojn kaj ekzamenojn. Tion mi ŝajne faros por la unua kurso de algebro. Tio tamen estas tre malgranda ĝeno, kaj mi ĝenerale tre ekscitiĝas pri tiu ĉi nova fazo de mia studado!

    Nuna humoro: ekscitita
    Nuna muziko: JeepJazz - Say, Buddy

  • De Vaterlo

    Hieraŭ mi vojaĝis de Otavo al Vaterlo, por alporti duonon el la posedaĵoj de Teodora kaj mi al nia nova loĝloko. La vojaĝo daŭris ok horojn, pro tio ke ni kelkfoje haltis.

    La plej interesa halto por mi estis en Kingstono, kie mi vizitis muzikinstrumentan vendejon kaj provis klavaron, pri kiu mi interesiĝas. Temas pri la klavaro Nord Electro 2, kiun produktas la sveda firmao Clavia. Ĝi imitas plurajn elektrajn instrumentojn de la sepdekaj jaroj, inkluzive hamondorgenon kaj la klavarojn Rhodes, Clavinet, kaj Wurlitzer. Mi ludis tiun klavaron dum eble 20 minutoj, kaj tre ŝatis ĝin! Kiam mia antaŭa klavaro vendiĝos, mi tuj aĉetos!

    Nia nova loĝloko estas tre granda, bela, kaj plaĉa. La nura malavantaĝo estas ke ĝi troviĝas iom for de la universitato. Sed malgraŭ tio, mi tre ŝatas ĝin, kaj supozas ke mi multe ĝuos mian jaron ĉi tie, dum kiu mi espereble magistriĝos. :-)

    Nuna humoro: malsata
    Nuna muziko: Herbie Hancock - Steppin’ In It

  • Nova stilo

    Nun preskaŭ ĉio en mia taglibro estas en Esperanto, pro tio ke mi ĵus esperantigis la “magazinan” stilon de LiveJournal. Por vidi ĝin, simple venu al mia taglibro. Laŭ mia kompreno, oni povas dividi sian stilon kun aliaj, do se ankaŭ vi volas uzi ĝin, simple sendu al mi mesaĝon.

    Nuna humoro: komputilumema
    Nuna muziko: Jamiroquai - Whatever It Is, I Just Can’t Stop

  • Mi estis la unua!

    Hieraŭ matene, mi rigardis la liston de proksimaj geografiaj kaŝejoj, kaj rimarkis unu novan. Mi vidis ke neniu ĝis tiam vizitis ĝin, kaj do mi tuj metis la koordinatojn en mian GPS-ilon kaj ekserĉis ĝin. Mi serĉis dum 20 minutoj, sed nenion trovis. Poste mi revenis hejmen, por legi la help-informeton kiu aperis en la paĝo pri la kaŝejo. Por rapide reatingi la kaŝejon, mi iris per mia unuciklo. Tiu help-informeto vere helpis. Montriĝis ke la kaŝejo fakte estis ĉ. 20 metrojn for de la donitaj koordinatoj.

    En la kaŝejo mi trovis tre interesan moneron. Kun ĝi estis informileto, kiu klarigis ke temas pri GeoCoin (geografia monero). Tiajn monerojn oni prenas de unu kaŝejo kaj metas en alian. Oni tion registras en reta datumbazo, por ke oni povu sekvi la movojn de la moneroj tra la mondo. Mi prenis la moneron, ĉar mi baldaŭ translokiĝos al Vaterlo, kaj povos tie lasi ĝin en iu kaŝejo.

    Krome, mi vidis ke mi fariĝis la unua, kiu trovis la novan kaŝejon. Hodiaŭ evidentiĝis ke multaj aliaj ankaŭ volis esti la unua, sed ne sukcesis. Mia amiko Arono diris ke mi tuj vizitu la paĝon de la kaŝejo. Tie mi vidis ke la sekva persono, kiu trovis la kaŝejon, eĉ fotis min dum mi foriris! Tiu sufiĉe amuziĝis pro tio, ke mi rajdas unuciklon! Aperis ankaŭ listo de kelkaj aliaj, kiuj vizitis la kaŝejon poste en tiu tago.

    Nuna humoro: sukcesa
    Nuna muziko: Four80East - Drive Time

  • Elektromanko!

    Sendube ĉiuj jam aŭdis pri la malapero de la elektro en Norda Ameriko. Mi vidis ke eĉ en la retejo de BBC ĝi estis la unua novaĵo dum iom da tempo!

    Mi loĝas nun en Otavo, kaj do estis trafita de tiu katastrofo. Ĝuste ĉi tie, mankis elektro dum pli ol 22 horoj. Komence mi apenaŭ rimarkis ion, pro tio ke mi uzis nur mian porteblan komputilon, kiu kompreneble funkcias senprobleme sen elektro. Sed malaperis mia retkonekto, pro tio ke miaj DSL-modemo kaj enkursigilo uzas elektron. Mi tamen sukcesis konekti al la reto per la modemo de mia portebla komputilo, kaj tiel eksciis pri la grando de la elektromanko.

    Post iom da tempo montriĝis ke la afero povus iom longe daŭri, kaj do mi decidis eliri kun Teodora por serĉi geografian kaŝejon (geocache). Ĝi troviĝis sur eta insulo inter Kebekio kaj Ontario. De tie, eblis vidi sur unu flanko de la rivero la brilajn lumojn de Hull, kaj sur la alia flanko la dorman mallumon de Otavo.

    Trovinte la kaŝejon, ni revenis hejmen, kaj lumigis la apartamenton per kandeloj. Mi supozis, ke dum la nokto reaperos la elektro, sed tio tute ne okazis. La sekvan matenon, montriĝis ke la urbocentro de Otavo daŭre estas sen elektro. Pro tio, Teodora ne devis labori, kaj do ni decidis tendumi kun kelkaj ŝiaj laborkolegoj. La elektro finfine reaperis tiun posttagmezon, unu horon antaŭ nia foriro.

    Sed nun, jam kvin tagojn post la malapero de la elektro, daŭre estas problemoj. Necesas tuta semajno por refunkciigi nuklean elektrocentralon, kaj Ontario dependas de pluraj tiaj centraloj. Pro tio, ne estos sufiĉa elektro en la provinco ĝis la fino de ĉi tiu semajno, kaj dume ni devas multe ŝpari elektron por ne kaŭzi pliajn problemojn. Sed la vetero ĉi tie fariĝas varmega, kaj mi multe volas ekuzi la klimatizilon!

    Nuna humoro: kontenta
    Nuna muziko: Oscar Peterson - Teenager

  • Geocaching!

    Dum la kvina Esperanto@Interreto en Bostono, mia amiko Arono pruntis al mi sian GPS-ilon, kaj mi tuj ekŝatis ĝin. Dum la tuta semajno mi uzis ĝin, kaj pro tio mi ekvolis aĉeti propran GPS-ilon. Antaŭ kelkaj semajnoj mi faris ĝuste tion.

    Arono ankaŭ rakontis al mi pri Geocaching. Temas pri ludo en kiu homoj kaŝas trezoretojn kaj afiŝas ties koordinatojn en la interreto. Poste interretanoj per siaj GPS-iloj serĉas la kaŝejojn, prenas la trezoretojn, kaj lasas proprajn trezoretojn por postaj trovontoj.

    Antaŭ kelkaj tagoj, mi por la unua fojo trovis tian trezoreton, kiu fakte troviĝis je nur unu kilometro for de mia apartamento. Oni kaŝis ĝin en la arbaro malantaŭ la kanada parlamentejo. Estis tre amuze! Certe mi baldaŭ serĉos pliajn trezoretojn. Eblas sekvi mian progreson en ĉi tiu paĝo, kiu listigas ĉiujn kaŝejojn, kiujn mi ĝis nun trovis.

    Nuna humoro: geografiema
    Nuna muziko: Michael Jackson - Don’t Stop ‘Til You Get Enough

  • Unikodo en Trillian!

    Dum du jaroj mi atendis la alvenon de unikodo en Trillian, kaj antaŭ du horoj ĝi alvenis! Ĵus aperis publika beta-versio de Trillian 2.0, kiun rajtas elŝuti ĉiuj posedantoj de Trillian 1.0. La nova versio ankaŭ subtenas enservilajn ICQ-ajn kontaktlistojn, komunikas kun la tujmesaĝilo Jabber, kaj havas tradukeblan interfacon. Morgaŭ mi komencos traduki ĝin en Esperanton. Se iu volas helpi pri la tradukado, bv. kontakti min por ke ni ne duoble laboru.

    Nuna humoro: ekscitita
    Nuna muziko: Herbie Hancock - Just Around The Corner

  • El Lesjöfors

    Ĉifoje mi skribas el interreta kafejo en Lesjöfors, kie nun okazas la IJK. Mi ne skribos multe, pro tio ke mi pagas laŭminute por la retkonekto.

    Ĝis nun la seminario tre bone pasis. Mi helpis pri la akceptado, kiu tre glate iris krom kiam temis pri kontrolo de UEA-membreco, ĉefe pro malrapideco en la Centra Oficejo. Mi ankaŭ partoprenis en kelkaj eventoj. Hieraŭ vespere mi ĉeestis koncerton de Ĵomart kaj Nataŝa, kiu fakte estis multe pli bona ol mi atendis. Ili sonas pli bone koncerte ol en MP3-oj. Poste mi sidis en la plenŝtopita gufujo, kie mi ludis kelkajn ludojn kun aliaj partoprenantoj. Estis tre amuze!

    Nu, tio sufiĉas por nun. Eble mi havos ŝancon skribi ion de mia ĉambro kaj poste afiŝi ĉi tie, por ne malŝpari ret-tempon.

  • Ĉe Janko

    Saluton el Svedio!

    Hieraŭ posttagmeze mi ekiris de Otavo, kaj hodiaŭ posttagmeze mi atingis Stokholmon kaj poste la apartamenton de mia amiko Janko Luin. Nun mi tie sidas kaj iomete interretumas. Bedaŭrinde mia valizo ne same bone fartas. Ĝi atingis Frankfurton sed ne ankoraŭ Stokholmon. Espereble ĝi alvenos morgaŭ.

    La celo de mia vojaĝo estas ĉeesti la ĉi-jaran IJK-n en Lesjöfors, Svedio. Morgaŭ mi iros tien por iom prepari kun la organiza teamo. Postmorgaŭ komenciĝos la kongreso, kaj pri tio mi ege antaŭĝojas, ĉar mi denove vidos multajn malnovajn amikojn.

    La nura bedaŭrindaĵo estas ke, laŭ mia kompreno, tute ne eblas konekti al la reto en Lesjöfors. Do estas sufiĉe verŝajne, ke mi ne reskribos ĉi tie ĝis post la renkontiĝo.

  • Kiu kanto de Dolcxamar vi estas?

    Vi estas la kanto “Ĉu vi Pretas?” Vi estas sentaŭgulo….Kaj fiera :)

    Kiu kanto de Dolcxamar vi estas?

  • Kia Esperantisto vi estas?

    Vi estas… aktivulo/organizanto

    Sen vi, ne ekzistus Esperanta komunumo! Vi aktive organizas eventojn kaj aranĝojn. Ofte oni forgesas danki vin pro viaj longaj horoj da senpaga laboro, sed vi scias en via koro ke vi estas heroo.

    Kia Esperantisto vi estas?

  • Sendrate!

    Nun mi por la unua fojo en la propra apartamento kaj per la propra komputilo (mia nova portebla) komputilumas tute sendrate. Estas tre mirige! Mi vere konvinkiĝis pri porteblaj komputiloj kaj sendrata retumado dum la E@I-seminario en Bostono, kaj iom post mia reveno mi komencis serĉi bonan porteblan komputilon. Hieraŭ mi ricevis ĝin, kaj hodiaŭ mi aĉetis sendratan enkursigilon (router), kiu tre bone funkcias. Estas bele labori dum mi sidas en la salono de mia apartamento. :-)

    Nuna humoro: ekscitita
    Nuna muziko: Herbie Hancock - Steppin’ In It

  • Acrophobia!

    Mi ne ĝis hodiaŭ aŭdis pri la ludo Acrophobia. Mi diskutis tabulludojn kun amuzulo, kaj li diris ke povus esti interese ludi Acrophobia en Esperanto. Mi tuj ekinteresiĝis, kaj eĉ ludis anglalingvan version de la ludo per IRC. Krome, mi decidis ĉisomere krei interretan version de tiu ludo. La unua paŝo: elpensi taŭgan nomon. Komentu se vi hazarde elpensos ion. :-)

    Nuna humoro: kreema
    Nuna muziko: Deadline (jt_deadl.xm)

  • La hieraŭa prezento

    Nia prezento ĉe CALICO tre bone pasis! Kelkajn horojn antaŭ la prezento, mi ricevis retpoŝtaĵon kun multe pli detalaj klarigoj pri la prezento. Tio multe helpis al Arono kaj mi en nia preparado. Ni kune verkis resumon pri la kreado de la paĝaro, kaj alportis ankaŭ jam pretajn flugfoliojn. Venis multaj interesatoj al nia budo. Iuj interesiĝis pri la paĝaro kaj ties teknika realigado, kaj aliaj pri la lingvo mem. Post la prezentado ni ambaŭ tre kontentis pri la rezulto, kaj iris kun Karlina (la edzino de Arono) kaj Teodora (mia koramikino) al restoracio por iomete malstreĉiĝi.

    Nuna humoro: kontenta
    Nuna muziko: Average White Band - When Will You Be Mine

  • Prezento kaj nova komputilo

    Hodiaŭ mi kun mia amiko Arono prezentos la projekton lernu! al la partoprenantoj de la ĉi-jara CALICO. (Temas pri konferenco pri perkomputila lingvoinstruado.) Ĝuste nun, mi ne scias multon pri la afero, kaj do mi skribos poste pri ĝi.

    Antaŭ kelkaj tagoj mi mendis porteblan komputilon. Temas pri Dell Inspiron 5100 kun 2,4 GHz-a procesoro, 512 MB da memoro, 40 GB-a durdisko, 15-cola ekrano (1400x1050), kaj interna 54 Mbps-a sendrata retkarto. Nun mi devas iel elteni dum la atendado… ĝi alvenos nur post kelkaj semajnoj.

    Estas iomete strange ke mi decidis aĉeti porteblan komputilon, ĉar mi antaŭ kelkaj monatoj pensis ke mi neniam povus alkutimiĝi al portebla. Sed dum la tuta E@I-seminario en Bostono mi uzis porteblan komputilon, kaj komencis tre ŝati ĝin! Pro tio mi decidis finfine forĵeti mian komputilegon kaj ekhavi porteblan. Mi tre ĝojas pri tio, ke mi finfine povos porti mian laboron kun mi al seminarioj kaj konferencoj!

    Nuna humoro: ekscitita
    Nuna muziko: Bill Withers - Use Me

  • Saluton de Otavo!

    Unue mi ŝatus diri ke mi aparte ĝuis la E@I-seminarion en Bostono. Estis belege revidi miajn amikojn, interalie amuzulo, kvarko, kaj elinjo. Dum la seminario ni prilaboris multajn projektojn, kaj kompreneble elpensis novajn. Evidentiĝis ke mi devos multe labori dum la somero!

    Post la seminario mi pasigis iom da tempo ĉe la gepatroj. Poste mi translokiĝis al Otavo, kie mi restos dum la somero. Kaj nun mi unuafoje skribas de Otavo. Bedaŭrinde mi devas nun konekti al la interreto per modemo, sed ekde ĵaŭdo mi havos rapidan interret-aliron.

    Mi bezonos ankoraŭ iom da tempo por tralegi la centojn da retpoŝtaĵoj (ĉu retpostaĵoj, amuzulo?) kiuj alvenis dum mia foresto, sed poste mi komencos prilabori interalie la projektojn lernu!, Interkulturo, kaj Skrablo.

    Nuna humoro: okupata
    Nuna muziko: George Benson - Turn Your Love Around

  • Finfine libera!

    Hodiaŭ mi faris ekzamenon pri la franca lingvo, kaj tiel finis miajn bakalaŭrajn studojn. Mi aparte ĝojas pri tio, ke ne venos pliaj ekzamenoj, nek hejmtaskoj, almenaŭ ne ĝis la aŭtuno kiam mi komencos magistrajn studojn. :-)

    Postmorgaŭ mi ekiros al Bostono, kie mi ĉeestos la kvinan E@I-seminarion. Tie mi prelegos pri MySQL kaj PHP, kaj diskutos diversajn interretajn projektojn kun aliaj aktivaj junuloj. Mi jam diskutis multajn projektideojn kun amuzulo, kaj vere ekscitiĝas pri tio, ke sendube aperos multaj novaj ideoj venontsemajne, el kiuj ni espereble realigos kelkajn dum la somero.

    Nuna humoro: denove energioplena
    Nuna muziko: Bass is Base - Funkmobile

  • Hejmtaskoj, ekzamenoj, kaj vortaroj

    Hodiaŭ mi finis la lastan hejmtaskegon por mia klaso pri kvantuma komputado. Restas unu farenda hejmtasko por alia klaso, sed feliĉe temas pri io pli facila. Sekvos kelkaj ekzamenoj, kaj post du semajnoj mi bakalaŭriĝos. Mi vere antaŭĝojas pri tio. :-)

    Cetere mi ĵus instalis ĉeĥan kaj litovan vortarojn ĉe lernu. Estas vere mirige, kiom progresas la projekto. Jam la paĝaro estas tradukita al 17 lingvoj. Mi ĝojas ke mi baldaŭ havos pli da tempo por prilabori ĝin.

    Post tiom da laboro, necesas iom amuziĝi, do mi ludos skrablon kun kelkaj amikoj. Ankaŭ vi nepre venu iam por ludi kun mi. :-)

    Nuna humoro: laboranta
    Nuna muziko: So Funky ! ! ! (funky.xm)

  • Finfine mi aliĝis!

    Antaŭ longa tempo, amuzulo montris ĉi tiun paĝaron al mi, sed tiam mi ne multe interesiĝis. Tiam ĝi estis ne tiel matura kiel nun, kaj mi ne konis aliajn, kiuj jam uzis ĝin. Sed antaŭ kelkaj tagoj aperis taglibro de unu el la programistoj de Trillian (ceruleansparks), kaj do mi denove pensis pri LiveJournal. Mi rimarkis ke la paĝaro multe pliboniĝis depost mia lasta vizito. Iom poste mi petis aliĝkodon de amuzulo kaj enskribiĝis. Do, jen mi!

    Nuna humoro: sukcesa
    Nuna muziko: JND - Song Life

subscribe via RSS